مستونگ: بلوچستان کے علاقے دشت میں ریلوے ٹریک پر ہونے والے دھماکے کے 28 گھنٹے گزرنے کے باوجود ٹریک کی بحالی کا کام مکمل نہیں ہو سکا، جس کے باعث کوئٹہ سے ٹرین آپریشن جمعرات کو بھی معطل رہے گا۔
ریلوے حکام کا کہنا ہے کہ دھماکے کے بعد پٹری سے اترنے والی جعفر ایکسپریس کی بوگیوں کو ہٹانے اور ٹریک کی مرمت کا آپریشن بدستور جاری ہے تاہم ملبہ زیادہ ہونے اور ٹریک کے شدید متاثر ہونے کے سبب بحالی میں تاخیر پیش آ رہی ہے۔
دھماکے کے باعث جعفر ایکسپریس کی پانچ بوگیاں پٹری سے اتر گئیں تھیں جس کے نتیجے میں پانچ مسافر زخمی بھی ہوئے۔ حکام کے مطابق 28 گھنٹے گزرنے کے باوجود ٹریک کلیئر نہ ہونے پر جمعرات کو کوئٹہ سے پشاور جانے والی اور پشاور سے کوئٹہ آنے والی جعفر ایکسپریس کی سروس منسوخ کر دی گئی ہے۔
واضح رہے کہ 23 ستمبر کو بلوچستان کے ضلع مستونگ کے علاقے دشت میں ریلوے ٹریک پر ہونے والے دھماکے نے پشاور سے کوئٹہ آنے والی جعفر ایکسپریس کو نشانہ بنایا تھا، جس کے نتیجے میں ٹریک کے متعدد حصے تباہ اور ٹرین کی بوگیاں پٹری سے اتر گئی تھیں۔ ریلوے حکام کا کہنا ہے کہ بحالی کے لیے تیز رفتاری سے کام جاری ہے تاہم متاثرہ سیکشن کی مکمل مرمت میں مزید وقت لگ سکتا ہے۔
