اسلام آباد: انکم ٹیکس گوشوارے جمع کرانے کی آخری تاریخ ختم ہونے میں چند روز باقی ہیں کہ ایف بی آر نے ٹیکس فارم میں اچانک تبدیلی کر دی، جس پر ٹیکس دہندگان نے شدید تحفظات کا اظہار کیا ہے۔
تفصیلات کے مطابق ایف بی آر نے انکم ٹیکس گوشوارے جمع کرانے کی ڈیڈ لائن 30 ستمبر مقرر کر رکھی ہے، تاہم آخری تاریخ سے چند روز قبل آئرس (IRIS) فارم میں ایک نیا کالم شامل کر دیا گیا ہے۔ اس کالم کے تحت اب ٹیکس دہندگان کے لیے اپنے اثاثوں کی مارکیٹ ویلیو ظاہر کرنا لازمی قرار دیا گیا ہے۔
ایف بی آر کی وضاحت کے مطابق اس مقصد کے لیے کوئی نیا ایس آر او جاری نہیں کیا گیا بلکہ یہ کالم 18 اگست کو شامل کیا گیا تھا۔ ادارے کے مطابق نئے کالم کا مقصد صرف اثاثوں کی مارکیٹ ویلیو کا تعین کرنا اور مستند ڈیٹا کی بنیاد پر بہتر پالیسی سازی ہے۔ ایف بی آر نے یقین دہانی کرائی ہے کہ اس کالم کی بنیاد پر کسی ٹیکس دہندہ کے خلاف کوئی کارروائی نہیں ہوگی اور یہ ٹیکس حساب کتاب پر اثر انداز نہیں ہوگا۔
تاہم ٹیکس دہندگان کا کہنا ہے کہ یہ تبدیلی آخری دنوں میں کرنے سے مسائل پیدا ہو گئے ہیں۔ ان کے مطابق جن افراد نے پہلے ہی اپنے گوشوارے جمع کروا دیے ہیں، انہیں اب دوبارہ فارم بھرنا پڑے گا کیونکہ اضافی کالم بھرے بغیر نیا فارم مکمل نہیں ہو پائے گا۔ اس صورتحال نے کئی افراد کو تشویش میں مبتلا کر دیا ہے اور وہ ڈیڈ لائن کے قریب نئے تقاضوں کو پورا کرنے میں دشواری کا سامنا کر رہے ہیں۔
