دبئی میں بھارتی کرکٹ بورڈ (بی سی سی آئی) نے اعلان کیا ہے کہ ایشیا کپ ٹرافی کے تنازعے کو اگلے ماہ ہونے والے انٹرنیشنل کرکٹ کونسل (آئی سی سی) اجلاس میں باضابطہ طور پر اٹھایا جائے گا۔ بی سی سی آئی کے سیکرٹری دیواجیت سائیکیا نے کہا کہ وہ نومبر کے پہلے ہفتے میں دبئی میں ہونے والے اجلاس میں ایشین کرکٹ کونسل (اے سی سی) کے چیئرمین کے خلاف سخت احتجاج ریکارڈ کرائیں گے۔
سائیکیا کے مطابق بھارتی کرکٹ بورڈ ہمیشہ اپنی حکومت کی پالیسی کے مطابق فیصلے کرتا ہے، اسی لیے پاک بھارت باہمی سیریز نہیں کھیلی جاتی۔ انہوں نے کہا کہ ایشیا کپ ایک کثیر القومی ٹورنامنٹ ہے اور بھارتی ٹیم پاکستانی ٹیم کو شکست دے کر فخر محسوس کرتی ہے۔
انہوں نے دعویٰ کیا کہ بھارتی کھلاڑیوں نے ٹرافی لینے سے اس لیے انکار کیا کیونکہ محسن نقوی پاکستان حکومت کے مرکزی رہنما ہیں۔ ان کے مطابق ٹرافی اور میڈلز اے سی سی کے چیئرمین کے پاس ہیں اور بھارتی ٹیم کو امید ہے کہ جلد یہ واپس بھارت کے حوالے کیے جائیں گے۔
سائیکیا نے بھارتی ٹیم کے لیے 21 کروڑ روپے کے انعام کا بھی اعلان کیا اور کہا کہ ٹیم نے ٹورنامنٹ میں شاندار کارکردگی دکھا کر ملک کا سر فخر سے بلند کیا ہے۔
واضح رہے کہ بھارتی ٹیم نے ایشیا کپ کے دوران تین بار پاکستانی ٹیم کا سامنا کیا لیکن نہ صرف ہاتھ ملانے سے گریز کیا بلکہ ٹرافی لینے سے بھی انکار کیا۔ بھارتی بورڈ نے اس معاملے پر ایشین کرکٹ کونسل کو باضابطہ شکایت درج کرائی تھی جس کے بعد ٹرافی کو میدان سے واپس منگوایا گیا۔ اس کے علاوہ بھارتی کپتان نے ٹرافی کی رونمائی کے موقع پر پاکستانی کپتان کے ساتھ مشترکہ تصویر کھنچوانے سے بھی انکار کیا تھا۔
