اسلام آباد: وفاقی وزیر ڈاکٹر طارق فضل چوہدری نے کہا ہے کہ وزیراعظم شہباز شریف وطن واپس آکر عوامی ایکشن کمیٹی آزاد کشمیر کو ملاقات کے لیے خود بُلائیں گے۔
ڈاکٹر طارق فضل چوہدری نے بتایا کہ حکومت نے مذاکرات کے دوران عوامی ایکشن کمیٹی آزاد کشمیر کے 95 فیصد مطالبات تسلیم کرلیے تھے، تاہم آخر میں کمیٹی نے کچھ ایسے مطالبات پیش کردیے جو بالکل نئے تھے اور ان پر عملدرآمد کے لیے آزاد کشمیر اسمبلی سے آئینی ترمیم درکار ہوگی۔
وفاقی وزیر نے کہا کہ وزیراعظم شہباز شریف کی وطن واپسی کے بعد وہ براہِ راست عوامی ایکشن کمیٹی آزاد کشمیر سے ملاقات کریں گے تاکہ تمام معاملات بات چیت کے ذریعے حل کیے جا سکیں۔
ڈاکٹر طارق فضل نے مزید کہا کہ بٹل آزاد کشمیر میں جوائنٹ عوامی ایکشن کمیٹی کے کارکنوں کی جانب سے ایمبولینس روکنے کے باعث مریض جاں بحق ہوگیا جو افسوسناک ہے۔ انہوں نے یہ بھی کہا کہ معرکہ حق میں بھارت کو شکست کے بعد اس کا مسئلہ کشمیر سے متعلق بیانیہ زمین بوس ہوگیا ہے اور پوری دنیا تسلیم کرچکی ہے کہ یہ معاملہ صرف ریجنل یا دوطرفہ نہیں بلکہ ایک بین الاقوامی مسئلہ ہے جو انشاء اللہ اب ضرور حل ہوگا۔
