کرکٹ آسٹریلیا کے سی ای او ٹوڈ گرین برگ نے امید ظاہر کی ہے کہ رواں برس پاکستانی کرکٹرز بگ بیش لیگ (بی بی ایل) میں ایکشن میں نظر آئیں گے۔ ان کا کہنا ہے کہ وہ پی سی بی کے ساتھ مسلسل رابطے میں ہیں اور این او سی کے معاملے پر کوئی مثبت حل نکلنے کی توقع ہے۔
ٹوڈ گرین برگ نے اپنے بیان میں کہا کہ پاکستان کرکٹ بورڈ کی جانب سے کھلاڑیوں کے این او سی روکے جانے پر بات چیت جاری ہے۔ "ہم چاہتے ہیں کہ یہ مسئلہ جلد از جلد حل ہو تاکہ پاکستانی کھلاڑی بی بی ایل کا حصہ بن سکیں۔ ہمیں یقین ہے کہ ان کی شمولیت لیگ کے معیار اور ویلیو میں مزید اضافہ کرے گی۔” انہوں نے مزید کہا کہ بی بی ایل کا یہ سیزن شاندار ہوگا اور وہ پاکستانی کھلاڑیوں کو خوش آمدید کہنے کے منتظر ہیں۔
واضح رہے کہ چند روز قبل پی سی بی نے اپنے کھلاڑیوں کے غیر ملکی لیگز کے لیے این او سی روک دیے تھے۔ ذرائع کے مطابق این او سی صرف ان کھلاڑیوں کو جاری کیے جائیں گے جو ڈومیسٹک اور انٹرنیشنل کرکٹ میں کارکردگی کے مقررہ معیار پر پورا اتریں گے۔
پاکستان کی جانب سے بابراعظم، شاہین شاہ آفریدی، حارث رؤف اور شاداب خان سمیت سات کھلاڑی بی بی ایل ڈرافٹ میں شامل ہیں۔ لیگ کا آغاز دسمبر میں ہوگا اور اگر این او سی کا مسئلہ حل ہو گیا تو پاکستانی کھلاڑی آسٹریلیا میں اپنی مہارت کے جوہر دکھاتے نظر آئیں گے۔
