اسلام آباد: وزیراعظم محمد شہباز شریف اقوام متحدہ کی جنرل اسمبلی میں شرکت اور اہم بین الاقوامی دوروں کے بعد وطن واپس پہنچ گئے۔ نور خان ایئر بیس پر اسپیکر قومی اسمبلی سردار ایاز صادق اور وفاقی وزیر داخلہ محسن نقوی نے ان کا استقبال کیا۔
وزیراعظم نے اپنے دورے کے دوران اقوام متحدہ کی جنرل اسمبلی میں خطاب کرتے ہوئے مسئلہ کشمیر اور فلسطین کو بھرپور انداز میں عالمی فورم پر اجاگر کیا۔ انہوں نے عالمی برادری کی توجہ مقبوضہ کشمیر میں انسانی حقوق کی سنگین خلاف ورزیوں اور فلسطینی عوام پر ڈھائے جانے والے مظالم کی طرف مبذول کروائی۔
اقوام متحدہ اجلاس کے موقع پر وزیراعظم شہباز شریف نے مختلف عالمی رہنماؤں سے ملاقاتیں بھی کیں جن میں امریکی صدر ڈونلڈ ٹرمپ سمیت اسلامی ممالک کے متعدد سربراہان شامل تھے۔ ان ملاقاتوں میں باہمی تعاون، سرمایہ کاری، خطے میں امن اور استحکام سے متعلق امور پر تفصیلی تبادلہ خیال کیا گیا۔
وزیراعظم کے سعودی عرب کے دورے کے دوران پاکستان اور سعودی عرب کے درمیان ایک تاریخی معاہدہ بھی طے پایا، جسے دونوں ممالک کے تعلقات میں ایک نئی جہت قرار دیا جا رہا ہے۔ اس معاہدے کے ذریعے دفاعی اور معاشی تعاون کو مزید وسعت دینے پر اتفاق کیا گیا۔
لندن میں قیام کے دوران وزیراعظم نے اپنا طبی معائنہ بھی کرایا اور اوورسیز پاکستانی کمیونٹی کے مختلف وفود سے ملاقاتیں کیں۔ ان ملاقاتوں میں بیرون ملک مقیم پاکستانیوں کے مسائل، سرمایہ کاری کے مواقع اور قومی ترقی میں ان کے کردار پر بات چیت کی گئی۔
حکومتی ذرائع کے مطابق وزیراعظم اپنے دورے کے دوران حاصل ہونے والے بین الاقوامی اعتماد اور سفارتی کامیابیوں کو ملکی ترقی اور معاشی استحکام کے لیے استعمال کرنے کا ارادہ رکھتے ہیں۔
