شمال مشرقی بحیرہ عرب میں موجود ڈیپ ڈپریشن سمندری طوفان میں تبدیل ہو گیا ہے جس کا نام ’شکتی‘ رکھا گیا ہے۔ یہ نام سری لنکا کی جانب سے تجویز کیا گیا ہے جس کا مطلب "طاقت” ہے۔
محکمہ موسمیات کے مطابق آئندہ 24 گھنٹوں میں اس کے شدید سمندری طوفان میں بدلنے کا امکان ہے۔ طوفان کے مرکز میں ہوا کی رفتار تقریباً 75 کلومیٹر فی گھنٹہ ریکارڈ کی گئی ہے جبکہ یہ سسٹم 6 اکتوبر تک بحیرہ عرب میں موجود رہ سکتا ہے۔
تازہ ترین اعداد و شمار کے مطابق، سمندری طوفان ’شکتی‘ اس وقت کراچی کے جنوب میں تقریباً 360 کلومیٹر کے فاصلے پر موجود ہے۔ طوفان کے اثرات کے باعث کراچی سمیت سندھ اور بلوچستان کے مختلف ساحلی علاقوں میں آج بھی بارش کا امکان ہے، جبکہ سمندر میں شدید طغیانی کی پیشگوئی کی گئی ہے۔
محکمہ موسمیات نے ماہی گیروں کو ہدایت جاری کی ہے کہ وہ 5 اکتوبر تک گہرے سمندر میں جانے سے گریز کریں تاکہ کسی بھی ممکنہ خطرے سے بچا جا سکے۔
ماہرین کے مطابق اگر یہ طوفان مزید شدت اختیار کرتا ہے تو ساحلی پٹی کے قریب بارشوں اور تیز ہواؤں کا خطرہ بڑھ سکتا ہے، اس لیے شہریوں کو محتاط رہنے اور متعلقہ اداروں کی ہدایات پر عمل کرنے کی ضرورت ہے۔
