اسلام آباد: وزیراعظم شہباز شریف نے غزہ میں حماس اور اسرائیل کے درمیان طے پانے والے مستقل جنگ بندی کے معاہدے کا خیرمقدم کرتے ہوئے کہا ہے کہ یہ معاہدہ مشرقِ وسطیٰ میں پائیدار امن کے قیام کی ایک بڑی امید ہے۔
وزیراعظم نے اپنے بیان میں کہا کہ فلسطینی عوام نے طویل عرصے تک ناقابلِ بیان مصائب اور ظلم برداشت کیے ہیں۔ غزہ میں نسل کشی کے خاتمے اور امن کے قیام کے اس معاہدے کا اعلان ایک تاریخی لمحہ ہے جو خطے میں امن و استحکام کے نئے دور کی بنیاد رکھے گا۔
شہباز شریف نے امریکی صدر ڈونلڈ ٹرمپ کی قیادت کو خراجِ تحسین پیش کرتے ہوئے کہا کہ صدر ٹرمپ نے مذاکرات کے عمل میں عالمی امن کے لیے غیر متزلزل عزم اور قائدانہ صلاحیتوں کا مظاہرہ کیا۔ انہوں نے قطر، مصر اور ترکیہ کے رہنماؤں کی بھی تعریف کی جنہوں نے امن معاہدے کے لیے انتھک کوششیں کیں اور فریقین کو مذاکرات کی میز پر لانے میں کلیدی کردار ادا کیا۔
وزیراعظم نے کہا کہ فلسطینی عوام کو ان کی بے مثال قربانیوں پر خراجِ عقیدت پیش کرتا ہوں۔ ان کی ثابت قدمی اور جدوجہد نے دنیا کو یہ احساس دلایا کہ انصاف اور آزادی کے لیے جدوجہد کبھی ضائع نہیں جاتی۔ انہوں نے کہا کہ اب عالمی برادری کی ذمہ داری ہے کہ وہ اس امن کو دیرپا بنانے کے لیے مؤثر کردار ادا کرے تاکہ ایسی تکلیف دہ صورتحال دوبارہ کبھی جنم نہ لے۔
شہباز شریف نے مسجدِ اقصیٰ میں حالیہ اشتعال انگیزیوں پر گہری تشویش کا اظہار کرتے ہوئے کہا کہ دنیا کو قابض قوتوں اور غیر قانونی آبادکاروں کو جواب دہ ٹھہرانا ہوگا۔ انہوں نے عالمی برادری سے اپیل کی کہ وہ ان تمام اقدامات کو روکے جو امن کی کوششوں کو نقصان پہنچا سکتے ہیں۔
وزیراعظم نے واضح کیا کہ پاکستان اپنے دوست ممالک کے ساتھ مل کر مشرقِ وسطیٰ میں پائیدار امن کے لیے کام کرتا رہے گا۔ انہوں نے کہا کہ فلسطینی عوام کے لیے امن، سلامتی اور وقار کو یقینی بنانا عالمی ذمہ داری ہے، اور پاکستان ہمیشہ اقوامِ متحدہ کی قراردادوں کے مطابق فلسطینی عوام کے جائز حقوق کی حمایت کرتا رہے گا۔
