اسرائیل نے فلسطین کے معروف سیاسی رہنما مروان البرغوثی کا نام غزہ جنگ بندی معاہدے کے تحت رہا ہونے والے افراد کی فہرست سے خارج کر دیا ہے۔
فتح موومنٹ سے تعلق رکھنے والے مروان البرغوثی 2003 سے اسرائیلی قید میں ہیں، تاہم 22 سال گزرنے کے باوجود وہ اب بھی مغربی کنارے اور غزہ کے سب سے مقبول فلسطینی رہنماؤں میں شمار ہوتے ہیں۔
غزہ جنگ بندی ڈیل کے تحت حماس کی جانب سے جن فلسطینی قیدیوں کی رہائی کے لیے نام پیش کیے گئے، ان میں مروان البرغوثی کا نام بھی زیر غور تھا، اور یہ خیال ظاہر کیا جا رہا تھا کہ رہائی کے بعد وہ فلسطینی اتھارٹی کی آئندہ قیادت میں اہم کردار ادا کر سکتے ہیں۔
تاہم عرب میڈیا کی رپورٹوں کے مطابق اسرائیلی حکام نے تصدیق کی ہے کہ مروان البرغوثی کا نام حتمی فہرست سے نکال دیا گیا ہے اور وہ اس معاہدے کے تحت رہا ہونے والے قیدیوں میں شامل نہیں ہیں۔
