لاہور: قذافی اسٹیڈیم میں کھیلے جا رہے پاکستان اور جنوبی افریقہ کے درمیان پہلے ٹیسٹ میچ کے دوسرے روز قومی ٹیم کی پہلی اننگز جاری ہے، اور گرین کیپس نے 8 وکٹوں کے نقصان پر 368 رنز بنا لیے ہیں۔
پاکستان نے آج اپنی نامکمل اننگز کا آغاز 313 رنز 5 کھلاڑی آؤٹ پر کیا۔ محمد رضوان 62 اور سلمان علی آغا 52 رنز کے ساتھ وکٹ پر موجود تھے۔
دوسرے روز کے آغاز پر محمد رضوان نے ذمہ دارانہ بیٹنگ کرتے ہوئے اپنی اننگز کو 75 رنز تک پہنچایا، تاہم وہ 362 کے مجموعی اسکور پر سینوران متھوسامے کی گیند پر آؤٹ ہوگئے۔ اسی اوور میں نعمان علی اور ساجد خان بغیر کوئی رن بنائے پویلین لوٹ گئے، یوں متھوسامے نے ایک ہی اوور میں تین وکٹیں حاصل کر کے جنوبی افریقہ کو میچ میں واپسی کا موقع فراہم کیا۔
دوسری جانب سلمان علی آغا 86 رنز کے ساتھ کریز پر ڈٹے ہوئے ہیں جبکہ ان کا ساتھ شاہین شاہ آفریدی دے رہے ہیں۔
واضح رہے کہ پہلے روز پاکستان نے شان مسعود اور بابر اعظم کی عمدہ بیٹنگ کی بدولت مضبوط آغاز فراہم کیا تھا۔ ٹیم مینجمنٹ کی امید ہے کہ باقی ماندہ کھلاڑی مجموعی اسکور کو 400 کے ہندسے تک لے جانے میں کامیاب ہوں گے تاکہ جنوبی افریقہ پر دباؤ برقرار رکھا جا سکے۔
