کراچی: سیکیورٹی ذرائع کے مطابق طالبان کی جانب سے پاکستان پر کیے گئے حالیہ حملے میں سوویت دور کے "ایلبرس” بیلسٹک میزائل سسٹم کے استعمال کا شبہ ظاہر کیا جا رہا ہے۔
افغانستان سے دو میزائل داغنے کی ایک ویڈیو سوشل میڈیا پر وائرل ہو رہی ہے جس میں طالبان کے قافلے کے ساتھ 8K14 اور 9M21F طرز کے میزائلوں کی نقل و حرکت واضح طور پر دیکھی جا سکتی ہے۔
ماہرین کے مطابق یہ میزائل سسٹم سوویت یونین کے دور میں تیار کیے گئے تھے اور طالبان نے انہیں 2022 میں ایک فوجی نمائش کے دوران پیش کیا تھا۔ اس وقت بتایا گیا تھا کہ طالبان نے سوویت یونین کے چھوڑے گئے پرانے میزائل سسٹمز — جن میں “ایلبرس” اور “لونا ایم” شامل ہیں — کو بحال کر لیا ہے۔
ملیٹری ویب سائٹ Militarnyi کی رپورٹ کے مطابق افغانستان سے موصولہ اطلاعات کے مطابق 12 اکتوبر کی رات طالبان نے مبینہ طور پر **9K72 ایلبرس (Elbrus)** بیلسٹک میزائل سسٹم استعمال کرتے ہوئے پاکستان پر حملہ کیا۔
سوشل میڈیا پر وائرل ویڈیو میں دو میزائل داغے جاتے ہوئے دیکھے جا سکتے ہیں، جن کے بارے میں تجزیہ کاروں کا کہنا ہے کہ یہ بیلسٹک نوعیت کے میزائل ہیں۔
یاد رہے کہ اس سے قبل کرم سیکٹر میں افغان طالبان اور فتنہ الخوارج کی بلااشتعال فائرنگ پر پاک فوج نے بھرپور جوابی کارروائی کی تھی، جس میں دشمن کے چھ ٹینک اور متعدد پوسٹیں عملے سمیت تباہ کر دی گئی تھیں۔
دفاعی تجزیہ کاروں کا کہنا ہے کہ اگر طالبان نے واقعی ایلبرس میزائل استعمال کیا ہے تو یہ نہ صرف ایک خطرناک پیش رفت ہے بلکہ خطے کے استحکام کے لیے بھی تشویشناک اشارہ ہے، کیونکہ یہ میزائل مختصر فاصلے تک ہدف کو نشانہ بنانے کی صلاحیت رکھتا ہے اور اس میں روایتی یا بارودی وارہیڈ نصب کیا جا سکتا ہے۔
