اسلام آباد: ملک بھر میں پیٹرولیم مصنوعات کی قیمتوں میں کل 16 اکتوبر سے نمایاں کمی کا امکان ظاہر کیا جا رہا ہے۔
ذرائع کے مطابق پیٹرول کی فی لیٹر قیمت میں تقریباً 6 روپے 10 پیسے تک کمی متوقع ہے، جب کہ ہائی اسپیڈ ڈیزل کی قیمت میں بھی 97 پیسے فی لیٹر کمی کا امکان ظاہر کیا گیا ہے۔
اقتصادی ماہرین کا کہنا ہے کہ عالمی منڈی میں خام تیل کی قیمتوں میں حالیہ کمی اور روپے کے مقابلے میں ڈالر کے استحکام نے مقامی سطح پر قیمتوں میں کمی کی گنجائش پیدا کی ہے۔
ذرائع کے مطابق نئی قیمتوں کا حتمی اعلان وزارت خزانہ کی جانب سے 15 اکتوبر کی رات کو کیا جائے گا، جس کے بعد نئی قیمتیں 16 اکتوبر (بدھ) سے نافذ ہوں گی۔
ماہرین کا کہنا ہے کہ اگر حکومت نے اوگرا کی سفارشات کے مطابق کمی کر دی تو اس سے عام شہریوں کو معمولی مگر اہم ریلیف ملے گا، خاص طور پر ٹرانسپورٹ اور اشیائے خورونوش کی ترسیل کے اخراجات میں کچھ کمی واقع ہو سکتی ہے۔
واضح رہے کہ گزشتہ چند ہفتوں میں بین الاقوامی مارکیٹ میں خام تیل کی قیمتیں 3 سے 4 ڈالر فی بیرل تک کم ہوئی ہیں، جس کا براہِ راست اثر پاکستان کی درآمدی لاگت پر پڑا ہے۔
