پاکستان اور افغانستان کے درمیان حالیہ سرحدی کشیدگی کے دوران پاکستان کی جانب سے کیے گئے ٹارگٹڈ آپریشن کے بعد افغان طالبان اور بھارتی میڈیا نے مصنوعی ذہانت (AI) کے ذریعے جعلی ویڈیوز بنا کر پاک فوج کے خلاف جھوٹا پروپیگنڈا شروع کر دیا ہے۔
ذرائع کے مطابق پاکستان نے سرحد پار سے کی جانے والی دہشت گرد کارروائیوں کے جواب میں چند ٹارگٹڈ آپریشنز کیے، جن کے نتیجے میں افغان طالبان کے متعدد ٹھکانے تباہ ہوئے۔ تاہم اس کے بعد افغان طالبان اور بھارتی میڈیا نے حقائق کو توڑ مروڑ کر پیش کرنا شروع کر دیا اور مصنوعی ذہانت کی مدد سے جعلی ویڈیوز بنا کر سوشل میڈیا پر پاکستان اور پاک فوج کے خلاف شدید پراپیگنڈا مہم چلا دی۔
سکیورٹی اداروں نے ان جعلی خبروں کی تفصیلات دیتے ہوئے بتایا کہ افغان طالبان کے ترجمان ذبیح اللہ مجاہد نے سوشل میڈیا پر ایک روسی ساختہ ٹینک کی ویڈیو جاری کی، جسے پاکستانی ٹینک قرار دے کر قبضے میں لینے کا دعویٰ کیا گیا۔ تاہم فیکٹ چیکنگ پلیٹ فارم “گروک” نے تصدیق کی کہ ویڈیو میں دکھایا گیا ٹینک دراصل افغان طالبان کے اپنے استعمال میں ہے اور پاکستانی فوج سے اس کا کوئی تعلق نہیں۔
اسی طرح چمن میں دوستی گیٹ سے متعلق بھی افغان طالبان نے ایک اور جھوٹا دعویٰ کیا کہ انہوں نے پاکستانی علاقے کی سمت موجود گیٹ کو تباہ کر دیا۔ لیکن سکیورٹی ذرائع نے واضح کیا کہ دھماکہ افغانستان کی طرف ہوا تھا اور طالبان نے خود اپنے ہی جانب موجود گیٹ کو آئی ای ڈی سے اڑایا، جب کہ پاکستانی سمت میں موجود گیٹ مکمل طور پر محفوظ ہے۔
اس سے قبل افغان اور بھارتی میڈیا نے کابل میں ہونے والے ایک زوردار دھماکے کو بھی ’’آئل ٹینکر پھٹنے‘‘ کا واقعہ قرار دیا، حالانکہ سکیورٹی ذرائع کے مطابق وہ حملہ دراصل پاک فوج کی precision strikes کے نتیجے میں ہوا، جس میں طالبان کے اہم ٹھکانے کو نشانہ بنایا گیا۔
مزید یہ کہ بھارتی میڈیا نے شمالی وزیرستان کے رہائشی عادل داوڑ کو جھوٹا بیانیہ پھیلاتے ہوئے شہید پاکستانی فوجی ظاہر کیا۔ بعدازاں عادل داوڑ نے خود ویڈیو پیغام میں ان تمام دعوؤں کو مسترد کرتے ہوئے وضاحت کی کہ وہ بالکل خیریت سے ہیں اور یہ سب بھارتی میڈیا کا جھوٹا پراپیگنڈا ہے۔
سکیورٹی اداروں کے مطابق افغان طالبان اور بھارتی میڈیا کا یہ گٹھ جوڑ اب کھل کر سامنے آچکا ہے۔ بھارت افغانستان میں موجود پاکستان مخالف عناصر کو استعمال کر کے خطے میں انتشار پھیلانے کی کوشش کر رہا ہے۔ اس سلسلے میں دونوں فریقین جدید ٹیکنالوجی، جعلی تصاویر، اور AI-generated ویڈیوز کے ذریعے غلط تاثر پیدا کرنے میں مصروف ہیں تاکہ عوامی رائے کو گمراہ کیا جا سکے۔
ذرائع کا کہنا ہے کہ پاکستان کی مسلح افواج پوری طرح باخبر ہیں اور سوشل میڈیا پر پھیلائے جانے والے ہر جھوٹے بیانیے کا حقائق کی بنیاد پر جواب دینے کا فیصلہ کیا گیا ہے۔ سکیورٹی حکام نے عوام سے اپیل کی ہے کہ وہ سوشل میڈیا پر گردش کرنے والی غیر تصدیق شدہ ویڈیوز اور خبروں پر یقین نہ کریں اور صرف مستند ذرائع سے حاصل شدہ معلومات پر انحصار کریں۔
