پشاور: خیبرپختونخوا میں نئی کابینہ کی تشکیل کے حوالے سے مشاورتوں کا سلسلہ تیزی سے جاری ہے، وزیر اعلیٰ سہیل آفریدی پر پارٹی کے اندرونی دباؤ میں اضافہ ہو گیا ہے کہ سابق وزراء کو دوبارہ کابینہ میں شامل کیا جائے۔
پارٹی ذرائع کے مطابق پختون یار اور سجاد بارکوال کے ناموں پر غور جاری ہے اور اس سلسلے میں وزیراعلیٰ سے مسلسل رابطے کیے جا رہے ہیں۔ ذرائع کا کہنا ہے کہ کے پی ہاؤس اسلام آباد میں گزشتہ رات دیر گئے پارٹی کے اہم رہنماؤں نے سہیل آفریدی سے تفصیلی ملاقاتیں کیں، جن میں نئی کابینہ کے ممکنہ ارکان کے حوالے سے مشاورت کی گئی۔
باخبر ذرائع نے بتایا کہ مرکزی سیکرٹری جنرل سلمان اکرم راجہ اب تک سہیل آفریدی سے تین مرتبہ ملاقات کر چکے ہیں تاکہ کابینہ کے فارمولے پر حتمی اتفاق رائے پیدا کیا جا سکے۔ پارٹی کے بعض حلقے تیمور سلیم جھگڑا کو وزارتِ صحت کے بجائے مشیر خزانہ بنانے کی تجویز دے رہے ہیں تاکہ معاشی نظم و ضبط میں بہتری لائی جا سکے۔
دوسری جانب، پارٹی کے صوبائی صدر جنید اکبر سمیت کئی رہنماؤں نے بیرسٹر سیف کو کابینہ میں شامل کرنے پر سخت اعتراضات اٹھائے ہیں۔ بعض سینئر رہنماؤں کا کہنا ہے کہ اگر کابینہ کی تشکیل میں مشاورت کا عمل وسیع نہ کیا گیا تو تنظیمی اختلافات مزید بڑھ سکتے ہیں۔
پارٹی کے سینئر رہنماؤں نے وزیراعلیٰ کو تجویز دی ہے کہ نئی کابینہ کے قیام سے قبل تمام اہم عہدیداران اور سابق وزراء کو اعتماد میں لیا جائے تاکہ صوبے میں حکومت سازی کا عمل مستحکم اور موثر انداز میں آگے بڑھ سکے۔
