اسلام آباد: پرائیویٹ اسکیم کے تحت حج 2026 پر روانگی کے خواہشمند عازمین کے لیے خوشخبری آ گئی ہے، وزارتِ مذہبی امور نے پرائیویٹ حج اسکیم کے تحت بکنگ کی آخری تاریخ میں 5 دن کی توسیع کر دی ہے۔
ذرائع کے مطابق، وزارت نے یہ فیصلہ عازمینِ حج کی سہولت اور بکنگ کے عمل کو مکمل کرنے کے لیے کیا ہے۔ توسیع کے بعد حج آرگنائزرز اب مزید پانچ روز تک بکنگ کر سکیں گے۔
ذرائع کا کہنا ہے کہ اس وقت بھی پرائیویٹ اسکیم کے تحت ساڑھے 4 ہزار نشستیں خالی ہیں، جن کے لیے درخواستیں موصول ہونا جاری ہیں۔ حکام کے مطابق، بکنگ کا عمل تیزی سے جاری ہے اور زیادہ تر حج گروپس نے اپنی سیٹیں مکمل کر لی ہیں۔
یاد رہے کہ اس سے قبل حج آرگنائزرز کو 17 اکتوبر تک بکنگ کی ڈیڈ لائن دی گئی تھی، تاہم بڑھتی ہوئی درخواستوں اور انتظامی وجوہات کی بنا پر اس مدت میں توسیع کر دی گئی ہے تاکہ تمام عازمین کو حج 2026 میں شامل ہونے کا موقع فراہم کیا جا سکے۔
