انسداد دہشتگردی عدالت راولپنڈی نے تحریک انصاف کے چیئرمین عمران خان کی ہمشیرہ علیمہ خان کے مسلسل عدم پیشی پر ناقابل ضمانت وارنٹ گرفتاری جاری کر دیے۔
تفصیلات کے مطابق علیمہ خان سمیت 11 ملزمان کے خلاف 26 نومبر کے احتجاج سے متعلق مقدمے کی سماعت انسداد دہشتگردی عدالت کے جج امجد علی شاہ نے کی۔
سماعت کے دوران علیمہ خان کے علاوہ مقدمے میں نامزد 10 دیگر ملزمان عدالت میں پیش ہوئے، جبکہ استغاثہ کے پانچ گواہان بھی مالِ مقدمہ سمیت عدالت کے روبرو پیش ہوئے۔
عدالت نے علیمہ خان کی بار بار عدم حاضری پر ان کے خلاف تیسری مرتبہ ناقابل ضمانت وارنٹ گرفتاری جاری کرتے ہوئے پولیس کو حکم دیا کہ انہیں گرفتار کرکے 22 اکتوبر کو عدالت میں پیش کیا جائے۔
اسی طرح عدالت نے علیمہ خان کے ضامن عمر شریف کے بھی ناقابل ضمانت وارنٹ گرفتاری جاری کر دیے اور ان کی جائیداد سے متعلق دستاویزات کی تصدیق کے لیے ڈپٹی کمشنر راولپنڈی کو ہدایات جاری کیں۔
ذرائع کے مطابق یہ مقدمہ 26 نومبر کے احتجاج کے دوران نقصِ امن اور پولیس سے جھڑپوں کے الزام میں درج کیا گیا تھا، جس میں علیمہ خان سمیت متعدد پی ٹی آئی رہنماؤں اور کارکنان کو نامزد کیا گیا ہے۔
