راولپنڈی: پاکستان اور جنوبی افریقا کے درمیان جاری دوسرے ٹیسٹ میچ کے دوسرے روز قومی ٹیم پہلی اننگز میں 333 رنز بنا کر آؤٹ ہوگئی۔
کھیل کے آغاز پر پاکستان نے اپنی نامکمل اننگز 259 رنز 5 کھلاڑی آؤٹ سے شروع کی۔ کریز پر موجود سعود شکیل 42 اور آغا سلمان 10 رنز کے ساتھ پراعتماد انداز میں بیٹنگ کر رہے تھے۔ دونوں کھلاڑیوں نے ذمہ دارانہ کھیل کا مظاہرہ کرتے ہوئے ٹیم کا مجموعی اسکور آگے بڑھایا۔ سعود شکیل نے اپنی نصف سنچری مکمل کی جبکہ آغا سلمان 45 رنز بنا کر آؤٹ ہوئے۔ سعود شکیل نے 66 رنز کی عمدہ اننگز کھیل کر ٹیم کے اسکور میں اہم اضافہ کیا۔
تاہم نچلے آرڈر کے بلے باز خاطر خواہ کارکردگی نہ دکھا سکے۔ شاہین آفریدی، ساجد خان اور آصف آفریدی جلد ہی پویلین لوٹ گئے۔ تینوں کو جنوبی افریقی اسپنر کیشوو مہاراج نے شکار بنایا۔ نعمان علی 6 رنز کے ساتھ ناٹ آؤٹ رہے۔
جنوبی افریقا کی جانب سے کیشوو مہاراج نے شاندار بولنگ کا مظاہرہ کرتے ہوئے 7 وکٹیں حاصل کیں۔ سائمن ہارمر نے دو جبکہ کگیسو ربادا نے ایک کھلاڑی کو آؤٹ کیا۔
اس سے قبل پہلے روز پاکستان نے ٹاس جیت کر بیٹنگ کا فیصلہ کیا تھا۔ اوپنرز نے ٹیم کو مستحکم آغاز فراہم کیا۔ کپتان شان مسعود نے 87 اور عبداللہ شفیق نے 57 رنز کی عمدہ اننگز کھیلی۔ مڈل آرڈر بلے بازوں میں بابر اعظم اور محمد رضوان بڑی اننگز کھیلنے میں ناکام رہے۔
واضح رہے کہ دو ٹیسٹ میچوں کی سیریز میں پاکستان کو ایک صفر کی برتری حاصل ہے۔ لاہور میں کھیلے گئے پہلے ٹیسٹ میں قومی ٹیم نے جنوبی افریقا کو 93 رنز سے شکست دی تھی۔ اب راولپنڈی ٹیسٹ میں پاکستان کی کوشش ہوگی کہ دوسری اننگز میں بہتر بولنگ کے ذریعے سیریز میں کلین سوئپ یقینی بنائے۔
