دنیا کی سب سے بڑی کلاؤڈ کمپیوٹنگ کمپنی ایمیزون ویب سروسز (AWS) کو ایک بڑی تکنیکی خرابی کا سامنا کرنا پڑا، جس کے نتیجے میں دنیا بھر کی سینکڑوں ویب سائٹس اچانک بند ہو گئیں اور لاکھوں صارفین متاثر ہوئے۔
غیر ملکی میڈیا رپورٹس کے مطابق یہ خرابی ایمیزون کے اندرونی نظام میں واقع اس حصے میں پیدا ہوئی جو نیٹ ورک لوڈ بیلنسنگ کے عمل کی نگرانی کرتا ہے۔ خرابی کے باعث ڈیٹا ٹریفک کے توازن میں بگاڑ پیدا ہوا جس سے دنیا بھر میں متعدد بڑی آن لائن سروسز متاثر ہوئیں۔
ذرائع کے مطابق اس تکنیکی مسئلے کے نتیجے میں ای کامرس، گیمنگ، مواصلاتی پلیٹ فارمز اور تعلیمی ایپس کو شدید مشکلات کا سامنا رہا۔ متاثر ہونے والی نمایاں ویب سائٹس اور ایپس میں چیٹ جی پی ٹی، اسنیپ چیٹ، زوم، روبلوکس، سگنل اور ڈوولنگو شامل ہیں۔ کئی صارفین نے ان پلیٹ فارمز تک رسائی میں رکاوٹ اور ڈیٹا لوڈنگ کے مسائل کی شکایات کیں۔
انٹرنیٹ بندش کی نگرانی کرنے والی ویب سائٹ ڈاؤن ڈیٹیکٹر (DownDetector) کے مطابق اس خرابی سے ایک ہزار سے زائد کمپنیاں متاثر ہوئیں۔ سب سے زیادہ شکایات امریکا، برطانیہ، کینیڈا، آسٹریلیا، جاپان اور جرمنی سے موصول ہوئیں، جہاں لاکھوں صارفین نے بیک وقت سروس ڈاؤن ہونے کی اطلاع دی۔
ٹیکنالوجی کے ماہرین نے ایمیزون ویب سروسز میں پیش آنے والے اس واقعے کو تاریخ کی سب سے بڑی تکنیکی خرابیوں میں سے ایک قرار دیا ہے، جس نے عالمی سطح پر ڈیجیٹل معیشت، آن لائن سروسز اور کلاؤڈ ڈیٹا آپریشنز کو متاثر کیا۔
دوسری جانب ایمیزون نے ایک وضاحتی بیان جاری کرتے ہوئے کہا کہ خرابی کی بنیادی وجہ کا پتہ لگا کر بیشتر نظام بحال کر دیے گئے ہیں، تاہم کچھ سروسز میں اب بھی تکنیکی مسائل برقرار ہیں۔ کمپنی کے مطابق اس کی انجینئرنگ ٹیمیں سسٹم کی مکمل بحالی کے لیے دن رات کام کر رہی ہیں تاکہ تمام متاثرہ سروسز دوبارہ فعال کی جا سکیں۔
ایمیزون کے ترجمان نے مزید کہا کہ “ہم صارفین کی مشکلات سے آگاہ ہیں اور انہیں یقین دلاتے ہیں کہ سروس کی بحالی ہمارا اولین ہدف ہے۔”
ماہرین کے مطابق یہ واقعہ عالمی انحصار کے اس پہلو کو نمایاں کرتا ہے جس میں چند بڑی کلاؤڈ کمپنیوں کی تکنیکی خرابی سے دنیا بھر میں ڈیجیٹل نظام مفلوج ہوسکتا ہے۔
