صوابی: پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ افغانستان میں خوارج کی موجودگی کے خلاف مؤثر اقدامات کیے گئے ہیں اور آئندہ بھی دشمن کی کسی بھی جارحیت کا بھرپور جواب دیا جائے گا۔
لیفٹیننٹ جنرل احمد شریف چوہدری نے غلام اسحاق خان انسٹیٹیوٹ آف انجینئرنگ سائنسز اینڈ ٹیکنالوجی (جی آئی کے) صوابی کا دورہ کیا، جہاں انہوں نے طلبہ و اساتذہ سے خطاب کرتے ہوئے حالیہ پاک افغان سرحدی جھڑپ، ملکی سلامتی کی صورتحال اور سوشل میڈیا کے مثبت و منفی کردار پر تفصیلی گفتگو کی۔
انہوں نے کہا کہ پاک فوج نے افغانستان میں موجود خوارج کے نیٹ ورکس کے خلاف مؤثر کارروائیاں کی ہیں، جن کے نتیجے میں دہشتگرد عناصر کی صلاحیت کو شدید نقصان پہنچا۔ ان کا کہنا تھا کہ دشمن کی جانب سے کسی بھی قسم کی جارحیت کی کوشش ناکام بنائی جائے گی، پاکستان کی سرحدیں محفوظ ہیں اور پاک فوج ہمہ وقت ملکی دفاع کے لیے تیار ہے۔
ڈی جی آئی ایس پی آر نے نوجوانوں کو مخاطب کرتے ہوئے کہا کہ پاکستان کا مستقبل نوجوانوں کے ہاتھ میں ہے، قوم کی ترقی اور خوشحالی میں نوجوان نسل کا کردار سب سے زیادہ اہم ہے۔ انہوں نے زور دیا کہ نوجوان سوشل میڈیا کو مثبت مقاصد کے لیے استعمال کریں اور افواہوں یا منفی پروپیگنڈے کا حصہ نہ بنیں۔
تقریب کے دوران طلبہ اور اساتذہ نے پاک فوج کے شہداء اور غازیوں کو زبردست خراجِ تحسین پیش کیا اور ان کی قربانیوں کو ملک کی بقاء و سلامتی کی بنیاد قرار دیا۔
