کرکٹ آسٹریلیا کے چیف ایگزیکٹو ٹوڈ گرین برگ نے تصدیق کی ہے کہ پاکستانی کھلاڑیوں کو بگ بیش لیگ (بی بی ایل) میں شرکت کی باضابطہ اجازت مل گئی ہے۔
ٹوڈ گرین برگ کا کہنا تھا کہ “پاکستانی کھلاڑیوں کے لیے بی بی ایل کھیلنے کی راہ ہموار ہو چکی ہے، اس حوالے سے گزشتہ ہفتے ہی کلیئرنس مل گئی تھی۔” انہوں نے مزید کہا کہ آسٹریلوی شائقین کرکٹ پاکستانی اسٹارز کو ایکشن میں دیکھنے کے لیے بے حد پرجوش ہیں۔ “پاکستان کے بہترین کھلاڑی اس سیزن میں بی بی ایل کا حصہ بنیں گے، ہم ان کی شمولیت سے لیگ کے معیار میں مزید بہتری کی توقع رکھتے ہیں۔”
واضح رہے کہ حال ہی میں پاکستان کرکٹ بورڈ (پی سی بی) نے غیر ملکی لیگز کے لیے این او سی (No Objection Certificate) پالیسی پر نظرِ ثانی کی تھی۔ نئے اصول کے تحت صرف وہ کھلاڑی این او سی حاصل کر سکتے ہیں جو قومی ذمہ داریوں کو ترجیح دیں گے اور گھریلو مقابلوں کے دوران دستیاب رہیں گے۔
پی سی بی نے پہلے سے جاری این او سی رکھنے والے کھلاڑیوں کو بی بی ایل کھیلنے کی اجازت دے دی تھی۔ اس فیصلے کے بعد کرکٹ آسٹریلیا اور پی سی بی کے درمیان کھلاڑیوں کی دستیابی کے معاملے پر مثبت پیش رفت ہوئی، جس کے نتیجے میں پاکستانی کھلاڑیوں کو مکمل کلیئرنس مل گئی۔
ذرائع کے مطابق بابر اعظم، محمد رضوان، شاہین شاہ آفریدی، حارث رؤف، حسن علی، شاداب خان اور حسان خان سمیت متعدد قومی کھلاڑی بی بی ایل کی مختلف فرنچائزز سے معاہدے کر چکے ہیں۔ ان کھلاڑیوں کی شمولیت نہ صرف لیگ کے معیار میں اضافہ کرے گی بلکہ آسٹریلیا میں پاکستانی کرکٹ کے مداحوں کے لیے بھی یہ خوشخبری ہے۔
