لاہور: وزیر اطلاعات پنجاب عظمیٰ بخاری نے کہا ہے کہ وزیراعلیٰ پنجاب مریم نواز کے ویژن کے تحت اب صوبے میں کسی غریب یا کمزور شخص کی زمین پر قبضہ نہیں ہونے دیا جائے گا، نئے پراپرٹی آرڈیننس کی منظوری سے قبضہ مافیا کا ہمیشہ کے لیے خاتمہ کردیا گیا ہے۔
اپنے بیان میں عظمیٰ بخاری نے کہا کہ ماضی میں 40، 40 سال تک زمینوں پر قبضے کے کیسز عدالتوں میں چلتے رہتے تھے مگر فیصلے نہیں آتے تھے، اب نئے نظام کے تحت ہر قبضے کے کیس کا فیصلہ 90 روز میں کیا جائے گا۔ انہوں نے کہا کہ وزیراعلیٰ مریم نواز پنجاب کے نظام کو ’’ریاست ہوگی، ماں جیسی‘‘ ماڈل کے طور پر استوار کر رہی ہیں جہاں عوام کو تحفظ، انصاف اور آسانیاں فراہم کی جائیں گی۔
وزیر اطلاعات نے کہا کہ پنجاب میں کسی کو غیرقانونی سرگرمیوں، اسلحے کی نمائش یا خوف و ہراس پھیلانے کی اجازت نہیں ہوگی۔ حکومت قانون کی بالادستی کو یقینی بنانے کے لیے سخت اقدامات کر رہی ہے۔
عظمیٰ بخاری کا کہنا تھا کہ مریم نواز کی اولین ترجیح عوام کے حقوق کا تحفظ اور کاروبار کے لیے سازگار ماحول پیدا کرنا ہے۔ انہوں نے کہا کہ وزیراعلیٰ پنجاب نے ترقی، شفافیت اور میرٹ کی بنیاد پر ایسا گورننس ماڈل متعارف کروایا ہے جو دوسرے صوبوں کے لیے بھی ایک مثال بن چکا ہے۔
ان کے مطابق مریم نواز روزانہ کی بنیاد پر عوامی فلاح کے نئے منصوبے شروع کر رہی ہیں تاکہ صوبے کے عوام کے معیارِ زندگی کو بہتر بنایا جا سکے۔ عظمیٰ بخاری نے مزید کہا کہ وسائل اور فنڈز کا درست استعمال پنجاب حکومت کی پہچان بن چکا ہے اور یہی طرزِ حکمرانی مستقبل میں پورے ملک کے لیے ایک مثبت مثال بنے گا۔
