کراچی میں ای چالان کے نظام کے خلاف سندھ ہائیکورٹ میں ایک اور درخواست دائر کر دی گئی ہے۔
یہ درخواست شہری جوہر عباس نے دائر کی ہے جس میں چیف سیکرٹری سندھ، آئی جی سندھ، ڈی آئی جی ٹریفک، ڈائریکٹر جنرل ایکسائز اینڈ ٹیکسیشن اور ڈائریکٹر جنرل نادرا کو فریق بنایا گیا ہے۔
درخواست میں مؤقف اپنایا گیا ہے کہ ٹریفک قوانین کی خلاف ورزی پر عائد کیے گئے جرمانے نہ صرف زیادہ ہیں بلکہ غیر منصفانہ بھی ہیں۔ شہری کے مطابق لاہور میں اسی خلاف ورزی پر 200 روپے جرمانہ کیا جاتا ہے جبکہ کراچی میں 5 ہزار روپے وصول کیے جا رہے ہیں جو شہریوں کے ساتھ ناانصافی ہے۔
درخواست گزار نے یہ بھی نشاندہی کی ہے کہ کراچی میں کئی بار ایسے ای چالان بھی جاری کیے گئے جن کا کوئی جواز نہیں بنتا، حتیٰ کہ چار سال قبل چوری ہونے والی موٹرسائیکل کے نام پر بھی ای چالان بھیج دیا گیا۔
درخواست میں استدعا کی گئی ہے کہ عدالت متعلقہ اداروں کو ہدایت دے کہ وہ ان بھاری جرمانوں کی منصفانہ بنیادوں پر وضاحت پیش کریں اور جب تک ایسا نہ ہو، تمام بھاری جرمانے فوری طور پر معطل کیے جائیں۔
