اسلام آباد: مسلم لیگ (ن) کے سینیٹر افنان اللہ نے سہیل آفریدی کے الزامات کو بلا ثبوت قرار دیتے ہوئے شدید تنقید کی
نجی ٹی وی کے پروگرام میں گفتگو کرتے ہوئے سینیٹر افنان اللہ کا کہنا تھا کہ سہیل آفریدی نے اخلاق سے گری ہوئی بات کی اور ان کے بیانات کے پیچھے کوئی دلیل نہیں ہے۔ انہوں نے کہا، "آپ بانی سے محبت کرتے ہیں، ٹھیک ہے، لیکن اس ملک سے بھی محبت ہونی چاہیے۔ آپ کا لیڈر کرپشن کے کیس میں اندر گیا ہے۔”
لیگی سینیٹر نے مزید کہا کہ 27 ویں آئینی ترمیم کے لیے قانون و انصاف کی مشترکہ کمیٹی تشکیل دی گئی تھی، جس میں آئینی عدالت کے قیام، آرٹیکل 243 اور ججز کے ٹرانسفر سے متعلق ترامیم شامل ہیں۔
افنان اللہ نے کہا کہ آئین یہ بتاتا ہے کہ حکومت چلانے کے لیے کیا اصول و ضوابط ہوں گے، آئین میں بہتری کا اثر حکومتی امور پر پڑتا ہے اور براہِ راست عوام پر اثر ہوتا ہے، اور اگر اکثریت ہو تو آئین میں ترامیم لانا قانونی اور جائز عمل ہے۔