لاہور: لاہور کی سیشن کورٹ نے وزیراعظم شہباز شریف کی جانب سے عمران خان کے خلاف دائر 10 ارب روپے ہرجانہ کیس میں عمران خان کے وکیل کی جرح کے لیے مہلت کی درخواست منظور کرلی۔
سیشن کورٹ کے جج یلماز غنی نے گزشتہ سماعت کا تحریری حکم نامہ جاری کرتے ہوئے بتایا کہ مقدمے میں شہباز شریف کے گواہ عطا اللہ تارڑ عدالت میں پیش ہوئے اور ان کا بیان قلم بند کر لیا گیا ہے۔ عمران خان کے وکیل کی جانب سے جرح کے لیے وقت دینے کی استدعا کی گئی جسے عدالت نے منظور کرلیا۔
تحریری حکم کے مطابق گواہ عطا اللہ تارڑ اب 15 نومبر کو دوبارہ عدالت میں پیش ہوں گے جہاں ان کے بیان پر عمران خان کے وکیل جرح کریں گے۔
واضح رہے کہ وزیراعظم شہباز شریف نے عمران خان کے خلاف 10 ارب روپے ہرجانے کا دعویٰ اس بنیاد پر دائر کیا تھا کہ عمران خان نے ان پر جھوٹے الزامات لگا کر ان کی ساکھ کو نقصان پہنچایا۔ یہ مقدمہ گزشتہ چند برسوں سے زیرِ سماعت ہے اور عدالت نے اس معاملے پر متعدد بار سماعت ملتوی کی ہے۔
ذرائع کے مطابق، عدالت میں اگلی پیشی پر کیس کی کارروائی کو آگے بڑھانے کے لیے دونوں فریقوں کو تفصیلی دلائل دینے کی ہدایت بھی متوقع ہے۔
