اسلام آباد: ملک میں پیٹرولیم مصنوعات کی قیمتوں میں آئندہ پندرہ روز کے لیے 9.60 روپے فی لیٹر تک اضافے کا امکان ہے۔
پیٹرولیم صنعت سے وابستہ ذرائع کے مطابق یہ اضافہ خلیجی خطے میں ڈیزل کی کمی کے باعث متوقع ہے۔ پاکستان زیادہ تر ڈیزل کویت سے درآمد کرتا ہے، تاہم کویت کی ایک ریفائنری میں مرمت کے باعث سپلائی متاثر ہوئی ہے۔
ذرائع نے بتایا کہ یہ مرمت نومبر کے آغاز میں مکمل ہونی تھی لیکن اب اسے مزید 15 روز کے لیے بڑھا دیا گیا ہے، جس سے علاقائی سطح پر ڈیزل کی قلت پیدا ہو گئی ہے۔ کویت کی الزور ریفائنری کے تین میں سے دو یونٹس ہی مکمل طور پر فعال ہیں، جس کے نتیجے میں ہائی اسپیڈ ڈیزل (HSD) کی پیداوار کم ہوئی اور عالمی قیمتیں بڑھ گئی ہیں۔
