پیپلز پارٹی کا وزیراعظم آزاد کشمیر کیخلاف تحریک عدم اعتماد فوری جمع کرانے کا فیصلہ

مظفرآباد: وزیراعظم آزاد کشمیر چوہدری انوار الحق کے خلاف تحریک عدم اعتماد کے لیے پیپلز پارٹی دوبارہ متحرک ہو گئی ہے اور فوری طور پر تحریک عدم اعتماد جمع کرانے کا فیصلہ کیا گیا ہے۔

ذرائع کے مطابق پیپلز پارٹی کی اعلیٰ قیادت نے اراکین اسمبلی کو فوری طور پر مظفرآباد پہنچنے کی ہدایت کر دی ہے۔ تحریک عدم اعتماد کی قرارداد پر اراکین کے دستخط کروا لیے گئے ہیں جبکہ نئے قائد ایوان کا نام آخری وقت میں شامل کیا جائے گا۔

ذرائع کے مطابق وزیراعظم آزاد کشمیر چوہدری انوار الحق نے بھی اپنے اسٹاف سے الوداعی ملاقاتیں شروع کر دی ہیں، جبکہ پیپلز پارٹی آزاد کشمیر کے صدر چوہدری یاسین کو وزیراعظم کے لیے پسندیدہ امیدوار قرار دیا جا رہا ہے۔

مزید اطلاعات کے مطابق مسلم لیگ ن بھی تحریک عدم اعتماد میں پیپلز پارٹی کا ساتھ دے گی اور امکان ہے کہ تحریک آج ہی جمع کرائی جائے۔ ذرائع نے بتایا کہ پاکستان میں حالیہ آئینی ترمیم کے سبب تحریک میں تاخیر ہوئی تھی۔

تحریک عدم اعتماد کے لیے آزاد کشمیر اسمبلی میں سادہ اکثریت یعنی 27 ووٹ درکار ہیں، تاہم پیپلز پارٹی کی جانب سے دعویٰ کیا جا رہا ہے کہ انہیں 36 سے زائد اراکین کی حمایت حاصل ہے۔