چیئرمین پی ٹی آئی بیرسٹر گوہر نے کہا ہے کہ سپریم کورٹ کے دو ججز نے استعفی دے دیا ہے۔
ان کا کہنا تھا کہ تحریک انصاف کی کوشش ہے کہ جمہوریت قائم رہے، لیکن موجودہ حالات ملک و قوم میں انتشار پیدا کر سکتے ہیں۔ پی ٹی آئی رہنما اسد قیصر نے کہا کہ پوری عدلیہ کو جسٹس منصور اور جسٹس اطہر من اللہ کے ساتھ کھڑا ہونا چاہیے۔
پارلیمنٹ ہاؤس کے باہر میڈیا سے گفتگو کرتے ہوئے بیرسٹر گوہر نے کہا کہ سپریم کورٹ آف پاکستان تو موجود ہے لیکن چیف جسٹس نہیں رہا۔ چیف جسٹس نے سپریم کورٹ میں حلف نہیں لیا، اور ہم اس اقدام کی شدید مذمت کرتے ہیں۔
انہوں نے کہا کہ اس طرح تو تحریکیں شروع ہوتی ہیں۔ انہوں نے مزید کہا کہ چھبیسویں اور ستائیسویں آئینی ترمیم میں بہت فرق ہے اور ہم ہر حال میں عدلیہ کو محفوظ رکھیں گے اور ان کا ساتھ دیں گے۔ اگر ترمیم کرنی بھی ہے تو اداروں کی آزادی اور عوام کی مرضی کے مطابق ہونی چاہیے۔ انہوں نے کہا کہ ہم پہلے بھی احتجاج کر چکے ہیں اور اب بھی کریں گے۔
پی ٹی آئی رہنما اسد قیصر نے کہا کہ ستائیسویں آئینی ترمیم کے بعد عدلیہ غیر فعال ہو گئی ہے۔ استعفیٰ دینے والے دونوں ججز نے جرات کا مظاہرہ کیا اور قوم کو ان کی قربانیوں کو نظر انداز نہیں کرنا چاہیے۔ انہوں نے کہا کہ آج دوپہر دو بجے اجلاس بلایا گیا ہے جس میں اگلا لائحہ عمل طے کیا جائے گا اور لیڈرشپ فیصلہ کرے گی کہ آگے کیسے بڑھنا ہے۔
