اڈیالہ جیل ذرائع کے مطابق پاکستان تحریک انصاف کے بانی چیئرمین عمران خان صحتمند ہیں اور جیل میں آنے والے ہر شخص کو ان سے ملاقات کروانے کی سہولت فراہم کی جاتی ہے۔ ذرائع کا کہنا ہے کہ عمران خان جیل میں محفوظ اور صحتمند ہیں اور ہفتے میں ایک بار ان سے بشریٰ بی بی کی ملاقات بھی کرائی جاتی ہے۔
ذرائع نے بتایا کہ اڈیالہ جیل میں ایک بیرک کے چھ کمرے عمران خان کے زیر استعمال ہیں اور انہیں ٹی وی اور اخبار کی سہولت دستیاب ہے۔ علاوہ ازیں، ہفتے میں ایک بار باہر سے کھانا منگوانے کی اجازت بھی ہے، جس میں دیسی مرغی اور مچھلی شامل ہیں۔
جیل ذرائع کے مطابق ملاقاتیں مکمل طور پر جیل مینوئل کے مطابق کرائی جاتی ہیں اور اڈیالہ جیل کی حدود میں آنے والے ہر شخص کو ملاقات کا حق حاصل ہے، جبکہ جیل کی حدود سے باہر ملاقات کا معاملہ جیل انتظامیہ کی ذمہ داری میں نہیں آتا۔
اس سے قبل سوشل میڈیا پر عمران خان کی صحت کے حوالے سے چلنے والی خبریں غلط اور مبالغہ آمیز ثابت ہو چکی ہیں، اور جیل ذرائع نے ان کی صحت و خیریت کی تصدیق کی ہے۔
