راولپنڈی کی انسداد دہشتگردی عدالت میں آج 26 نومبر کے احتجاج کے مقدمے کی سماعت ہوئی، جس میں علیمہ خان سمیت 11 ملزمان نامزد ہیں۔ سماعت کے سلسلے میں علیمہ خان اور ان کے وکلا عدالت میں پیش نہیں ہوئے، جس پر عدالت نے برہمی کا اظہار کیا۔
سماعت کے دوران پراسیکیوشن نے مؤقف اختیار کیا کہ ملزمہ نے عدالت کو یقین دہانی کرائی تھی کہ وہ ہر سماعت پر پیش ہوں گی، لیکن اس کے باوجود آج عدالت میں حاضر نہیں ہوئیں۔ پراسیکیوشن نے درخواست کی کہ عدم حاضری کے باعث ان کے ضمانتی مچلکے ضبط کیے جائیں۔
عدالت نے پراسیکیوشن کی استدعا منظور کرتے ہوئے علیمہ خان کے ضمانتی مچلکے ضبط کرنے کا حکم جاری کر دیا۔ عدالت نے ان کے قابلِ ضمانت وارنٹ بھی جاری کر دیے اور ساتھ ہی ضمانت منسوخی کے نوٹس بھی جاری کیے گئے۔ حکم کے مطابق علیمہ خان کے 10، 10 لاکھ روپے کے دو ضمانتی مچلکے ضبط کیے جائیں گے۔
سماعت کے بعد عدالت نے کیس کی مزید کارروائی 15 دسمبر تک ملتوی کر دی۔ عدالتی کاروائی ملتوی ہونے کے کچھ دیر بعد علیمہ خان اپنے وکیل کے ہمراہ عدالت پہنچیں۔
