پشاور: تحریک انصاف نے پشاور میں ہونے والے جلسے میں مطلوبہ تعداد میں کارکن نہ لانے پر ضلعی تنظیم کے 25 اراکین کو شوکاز نوٹس جاری کر دیے ہیں۔
تحریک انصاف کی جانب سے 7 دسمبر کو پشاور کے حیات آباد اسپورٹس کمپلیکس میں جلسہ منعقد کیا گیا تھا، جس سے وزیراعلیٰ خیبرپختونخوا سہیل آفریدی نے بھی خطاب کیا تھا۔ تاہم پارٹی قیادت کی جانب سے جلسے میں شرکت کے اہداف پورے نہ ہونے پر تنظیمی سطح پر کارروائی کا فیصلہ کیا گیا۔
پارٹی کی جانب سے جاری شوکاز نوٹس میں کہا گیا ہے کہ ضلعی تنظیم کے عہدیداروں نے پارٹی احکامات پر عمل درآمد نہیں کیا اور متعلقہ پی ٹی آئی عہدیدار کارکنوں کو جلسہ گاہ تک لانے میں ناکام رہے۔
شوکاز نوٹس میں تمام متعلقہ اراکین کو تین دن کے اندر اپنی وضاحت پیش کرنے کی ہدایت کی گئی ہے، جبکہ واضح کیا گیا ہے کہ اگر تسلی بخش جواب موصول نہ ہوا تو ان کے خلاف تادیبی کارروائی عمل میں لائی جائے گی۔
اس حوالے سے پی ٹی آئی ذرائع کا کہنا ہے کہ شوکاز نوٹس کے اجرا کے بعد پارٹی کے کئی ضلعی عہدیداروں نے اپنے استعفے بھی پیش کر دیے ہیں، جس سے پارٹی کی اندرونی صورتحال پر سوالات اٹھنے لگے ہیں۔
