اسلام آباد: عالمی مالیاتی فنڈ (آئی ایم ایف) نے بےنظیر انکم سپورٹ پروگرام (بی آئی ایس پی) کا بجٹ بڑھانے پر اطمینان کا اظہار کیا ہے، تاہم ساتھ ہی پروگرام کے تحت دی جانے والی امداد میں مزید اضافے کا مطالبہ بھی کیا ہے۔
رپورٹ کے مطابق آئی ایم ایف حکام کا کہنا ہے کہ بےنظیر انکم سپورٹ پروگرام کے بجٹ کو مضبوط بنایا گیا ہے، لیکن بین الاقوامی معیار کے مقابلے میں بےنظیر کفالت پروگرام کے تحت دی جانے والی رقم اب بھی کم ہے۔ آئی ایم ایف کے مطابق صارفین کی قوتِ خرید برقرار رکھنے کے لیے مراعات میں مناسب اضافہ ناگزیر ہے۔
رپورٹ میں بتایا گیا ہے کہ آئی ایم ایف نے کفالت پروگرام کی امداد کو کم آمدنی والے طبقے کی کھپت کے 15 فیصد تک لے جانے کی تجویز دی ہے، جبکہ کفالت پروگرام کی رقم کو افراطِ زر کے مطابق ایڈجسٹ کرنے کی بھی سفارش کی گئی ہے۔
آئی ایم ایف کے مطابق بی آئی ایس پی کے بجٹ میں امدادی پروگراموں پر اخراجات میں 20 فیصد اضافہ شامل ہے، جس کے نتیجے میں کفالت پروگرام کے تحت نقد کیش امداد میں اضافہ کیا جانا چاہیے۔ عالمی مالیاتی ادارے نے غیرمشروط نقد امداد کی رقم 13 ہزار 500 روپے سے بڑھا کر 14 ہزار 500 روپے کرنے اور کفالت پروگرام کی کوریج میں کم از کم 2 لاکھ خاندانوں کے اضافے کی تجویز دی ہے۔
آئی ایم ایف کا کہنا ہے کہ مالی سال 2026 کے اختتام تک مستفید خاندانوں کی تعداد 10.2 ملین تک پہنچ جائے گی، جبکہ 2026 میں نئے گھریلو سروے کے بعد کفالت پروگرام کی امداد میں مزید اضافہ کیا جانا چاہیے۔ اس کے علاوہ آئی ایم ایف نے کنڈیشنل کیش ٹرانسفر پروگرام کی کوریج میں توسیع کی سفارش بھی کی ہے اور کہا ہے کہ بی آئی ایس پی کے کنڈیشنل کیش ٹرانسفر کے بجٹ کا مکمل استعمال انتہائی اہم ہے۔
