پاک بحریہ نے بحیرہ عرب میں سطح آب سے فضا تک مار کرنے والے میزائل کے فائر پاور کا شاندار مظاہرہ کیا۔
ترجمان پاک بحریہ کے مطابق پاک بحریہ نے شمالی بحیرہ عرب میں سطح آب سے فضا تک مار کرنے والے جدید ایف ایم 90 این ای آر میزائل کی کامیاب لائیو فائرنگ کرکے اپنی جنگی صلاحیت، تکنیکی برتری اور اعلیٰ سطح کی آپریشنل تیاری کا بھرپور مظاہرہ کیا ہے۔ اس کامیاب مشق کا مقصد فضائی خطرات کے خلاف بحری دفاع کو مزید مضبوط بنانا اور جنگی حالات میں فوری اور مؤثر ردعمل کی صلاحیت کو جانچنا تھا۔
ترجمان کے مطابق فائر پاور کے اس شاندار مظاہرے کے دوران انتہائی تیز رفتاری سے حرکت کرنے والے فضائی اہداف کو نہایت درستگی اور کامیابی کے ساتھ نشانہ بنایا گیا۔ لائیو میزائل فائرنگ کا یہ کامیاب تجربہ اس بات کا واضح ثبوت ہے کہ پاک بحریہ کسی بھی ممکنہ خطرے سے نمٹنے کے لیے مکمل طور پر تیار اور مستعد ہے، اور اس کے ہتھیاروں کے نظام جدید تقاضوں سے ہم آہنگ ہیں۔
پاک بحریہ کے ترجمان کا کہنا تھا کہ یہ مشق بحری افواج کی مجموعی آپریشنل صلاحیت، مربوط کمانڈ اینڈ کنٹرول سسٹم اور اہلکاروں کی پیشہ ورانہ مہارت کی عکاس ہے۔ اس فائر پاور ڈسپلے کے ذریعے دشمن کو واضح پیغام دیا گیا ہے کہ پاکستان اپنے سمندری دفاع پر کسی قسم کا سمجھوتہ نہیں کرے گا۔
ترجمان کے مطابق کمانڈر پاکستان فلیٹ ریئر ایڈمرل عبد المنیب نے اس فائر پاور ڈسپلے کا مشاہدہ کیا اور پاک بحریہ کی آپریشنل تیاری اور جنگی صلاحیتوں پر مکمل اطمینان کا اظہار کیا۔ انہوں نے میزائل فائرنگ میں حصہ لینے والے افسران اور جوانوں کی اعلیٰ پیشہ ورانہ مہارت، نظم و ضبط، عزم اور لگن کو سراہا۔
کمانڈر پاکستان فلیٹ ریئر ایڈمرل عبد المنیب نے اس موقع پر کہا کہ پاک بحریہ ہر صورت ملکی سمندری دفاع اور قومی بحری مفادات کے تحفظ کے لیے پرعزم ہے۔ انہوں نے اس عزم کا اعادہ کیا کہ پاک بحریہ کسی بھی چیلنج، خطرے یا جارحیت کا مؤثر اور بھرپور جواب دینے کے لیے ہمہ وقت تیار ہے اور ملک کی سمندری سرحدوں کے دفاع میں کوئی کسر اٹھا نہیں رکھے گی۔
انہوں نے مزید کہا کہ اس طرح کی مشقیں نہ صرف جنگی تیاری کو برقرار رکھنے میں مدد دیتی ہیں بلکہ افسران اور جوانوں کے حوصلے اور اعتماد میں بھی اضافہ کرتی ہیں، جو قومی سلامتی کے لیے انتہائی اہم ہے۔
