پاکستان نے سڈنی فائرنگ واقعے کی شدید مذمت، متاثرہ خاندانوں سے ہمدردی کا اظہار
پاکستان نے آسٹریلیا کے شہر سڈنی میں پیش آنے والے افسوسناک فائرنگ واقعے کی شدید الفاظ میں مذمت کی ہے اور متاثرہ خاندانوں کے ساتھ مکمل یکجہتی کا اظہار کیا ہے۔
صدر مملکت آصف زرداری نے واقعے میں ہلاک اور زخمی ہونے والوں کے لیے ہمدردی کا اظہار کرتے ہوئے کہا کہ پاکستان خود دہشت گردی سے شدید متاثر رہا ہے، اس لیے ایسے حملوں سے معاشروں کو پہنچنے والے درد اور صدمے کو بخوبی سمجھتا ہے۔ صدر زرداری نے آسٹریلیا کی حکومت اور عوام کے ساتھ مکمل یکجہتی کا اظہار کیا اور دہشت گردی کی تمام صورتوں کے خلاف پاکستان کے اصولی موقف کو دہرایا۔
وزیر اعظم شہباز شریف نے بھی اس واقعے پر ردعمل دیتے ہوئے کہا کہ پاکستان ہر قسم کے دہشت گردانہ واقعے کی مذمت کرتا ہے اور مشکل کی اس گھڑی میں آسٹریلوی حکومت، عوام اور متاثرہ خاندانوں کے ساتھ کھڑا ہے۔
نائب وزیراعظم اسحاق ڈار اور وفاقی وزیر داخلہ محسن نقوی نے بھی اس دہشت گردانہ واقعے کی شدید مذمت کی اور آسٹریلوی حکومت و عوام سے دلی تعزیت کا اظہار کیا۔ وزیر داخلہ نے اپنے پیغام میں کہا کہ دہشت گردی انسانیت کے خلاف ناقابل معافی جرم ہے اور اس خطرے کا پاکستان کو بھی سامنا ہے، اس لیے وہ آسٹریلوی عوام کے درد کو سمجھتے ہیں۔
خیال رہے کہ آسٹریلیا کے شہر سڈنی کے بونڈی بیچ پر دو مسلح افراد نے شہریوں پر فائرنگ کی جس کے نتیجے میں 16 افراد ہلاک اور 40 زخمی ہوئے۔ پولیس کی جوابی کارروائی میں ایک حملہ آور ہلاک اور دوسرا زخمی حالت میں حراست میں لے لیا گیا۔ اس واقعے میں ایک شہری نے اپنی جان خطرے میں ڈال کر ایک حملہ آور کو قابو میں کیا اور متعدد لوگوں کی جانیں بچائیں، جسے آسٹریلوی میڈیا نے بہادری کی مثال قرار دیا ہے۔
پاکستان کی جانب سے اس واقعے پر ہمدردی اور یکجہتی کے پیغامات ظاہر کرتے ہوئے عالمی سطح پر دہشت گردی کے خلاف مشترکہ اقدامات کی ضرورت پر زور دیا گیا ہے۔
