دنیا کے آلودہ ترین شہروں کی فہرست میں لاہور آج بھی پہلے نمبر پر رہا
دنیا کے آلودہ ترین شہروں کی فہرست میں لاہور ایک بار پھر سرفہرست رہا، جبکہ ملک کے مختلف شہروں کی فضا آج بھی انتہائی مضرِ صحت ریکارڈ کی گئی ہے۔ فضائی آلودگی کے باعث شہریوں کو سانس، آنکھوں اور گلے کی بیماریوں سمیت دیگر صحت کے سنگین مسائل کا سامنا ہے۔
عالمی ماحولیاتی ویب سائٹ کے مطابق لاہور میں فضائی آلودگی کی سطح تشویشناک حد تک برقرار ہے اور شہر میں ایئر پارٹیکولیٹ میٹر 342 ریکارڈ کیا گیا، جس کے ساتھ لاہور دنیا کے بڑے آلودہ ترین شہروں میں پہلے نمبر پر رہا۔ ماہرین کے مطابق اسموگ، گاڑیوں کا دھواں، صنعتی آلودگی اور موسمی حالات فضائی آلودگی میں اضافے کی بڑی وجوہات ہیں۔
اسی عالمی ماحولیاتی ویب سائٹ کے اعداد و شمار کے مطابق پشاور 435 اے کیو آئی کے ساتھ ملک کا سب سے زیادہ آلودہ شہر قرار پایا، جبکہ فیصل آباد میں فضائی آلودگی کا انڈیکس 278 ریکارڈ کیا گیا۔ بڑھتی ہوئی آلودگی کے باعث شہریوں میں تشویش پائی جا رہی ہے اور محکمہ صحت نے احتیاطی تدابیر اختیار کرنے کی ہدایات جاری کر رکھی ہیں۔
محکمہ ماحولیات پنجاب کے مطابق دیگر شہروں میں بھی فضائی آلودگی خطرناک سطح پر ہے۔ نارووال کا ایئر کوالٹی انڈیکس 279، شیخوپورہ کا 251 جبکہ خانیوال کا 236 ریکارڈ کیا گیا ہے۔ ماہرین نے خبردار کیا ہے کہ اگر مؤثر اقدامات نہ کیے گئے تو آئندہ دنوں میں صورتحال مزید خراب ہو سکتی ہے۔
شہریوں کو غیر ضروری طور پر گھروں سے باہر نکلنے سے گریز، ماسک کے استعمال اور بچوں، بزرگوں و مریضوں کا خاص خیال رکھنے کی ہدایت کی جا رہی ہے، جبکہ ماحولیاتی ماہرین آلودگی کے خاتمے کے لیے فوری اور ٹھوس حکومتی اقدامات پر زور دے رہے ہیں۔
