برطانوی دفاعی جریدے کِی ایرو (Key_Aero) میگزین کی تحقیقی رپورٹ میں انکشاف کیا گیا ہے کہ مئی میں پاکستان اور بھارت کے درمیان ہونے والی 52 منٹ کی فضائی جھڑپ کے دوران بھارتی فضائیہ کے 4 رافیل لڑاکا طیارے تباہ ہوئے۔ رپورٹ کے مطابق یہ فضائی معرکہ مختصر دورانیے کے باوجود شدت اور نتائج کے لحاظ سے غیر معمولی تھا۔
رپورٹ میں بتایا گیا ہے کہ تباہ ہونے والے رافیل طیاروں کے سیریل نمبرز بی ایس 001، بی ایس 021، بی ایس 022 اور بی ایس 027 تھے۔ برطانوی جریدے کے مطابق بھارت ان چاروں طیاروں کے حوالے سے سیریل نمبرز کے ساتھ کوئی واضح اور مستند تصاویر پیش کرنے میں ناکام رہا، جس سے بھارتی مؤقف پر مزید سوالات جنم لے رہے ہیں۔
یہ بھی بتایا گیا ہے کہ پاکستان کے ملٹی ڈومین آپریشنز نے بھارتی فضائیہ کو شدید نقصان پہنچایا۔ بھارتی فضائیہ کے مجموعی نقصانات میں 4 رافیل طیاروں کے علاوہ مگ 29، ایس یو 30 اور ہیرون ڈرون بھی شامل تھے، جس نے بھارتی فضائی صلاحیتوں کو وقتی طور پر مفلوج کر دیا۔
برطانوی جریدے کی رپورٹ میں مزید کہا گیا ہے کہ 10 مئی کو جے ایف 17 سی بلاک 3 نے ادھم پور میں بھارت کے جدید فضائی دفاعی نظام ایس 400 کو تباہ کیا، جبکہ پاکستانی فضائیہ نے برنالا میں بھارتی کمانڈ اینڈ کنٹرول سسٹم کو بھی نشانہ بنایا، جس سے بھارتی عسکری رابطہ نظام متاثر ہوا۔
رپورٹ کے مطابق پاکستانی سائبر یونٹس نے بھارت کے تقریباً 96 فیصد سوشل نیٹ ورکس اور ڈیجیٹل نظام کو مفلوج کر دیا۔ رپورٹ میں یہ بھی کہا گیا ہے کہ یہ پہلا موقع تھا جب کسی فضائیہ نے سائبر وارفیئر اور روایتی عسکری اقدامات کو یکجا کرتے ہوئے مؤثر کارروائی کی۔
برطانوی جریدے نے یہ بھی یاد دلایا کہ بھارتی چیف آف ڈیفنس اسٹاف جنرل انیل چوہان نے ایک انٹرویو میں بھارتی طیاروں کی تباہی کو تسلیم کیا تھا۔ اس سے قبل بھی پاکستانی فضائیہ نے آپریشن سوئفٹ ریٹارٹ کے دوران بھارتی مگ 21 طیارہ مار گرایا تھا، جو خطے کی فضائی تاریخ کا ایک اہم واقعہ سمجھا جاتا ہے۔
