اسلام آباد: خود کو امریکی سفارت خانے کا اہلکار ظاہر کرنے والا ایک جعل ساز گرفتار کر لیا گیا ہے۔
ذرائع کے مطابق گرفتار ملزم افغان شہری ہے جو فراڈ کیسز میں پہلے سے مطلوب تھا۔ ملزم نے گاڑی کے ذریعے ڈپلومیٹک انکلیو میں داخل ہونے کی کوشش کی تھی، جس پر امریکی سفارت خانے نے متعلقہ حکام کو شکایت کی۔
پولیس نے انٹیلی جنس ایجنسیوں کی مدد سے کارروائی کرتے ہوئے ملزم کو گرفتار کر لیا اور مزید قانونی کارروائی کے لیے اسے تھانہ سیکرٹریٹ منتقل کر دیا گیا ہے۔
ذرائع کا کہنا ہے کہ گرفتار ملزم کے خلاف فراڈ اور جعل سازی کے مقدمات درج کیے جائیں گے اور اس کے ممکنہ دیگر جرائم کی تحقیقات بھی جاری ہیں۔
