لکھنو: دھند اور خراب موسم کے باعث بھارت اور جنوبی افریقا کے درمیان چوتھا ٹی ٹوئنٹی میچ ختم ہونے پر شائقین میں شدید مایوسی اور برہمی پھیل گئی ہے۔
ذرائع کے مطابق لکھنو میں میچ حدِ نگاہ کم ہونے کی وجہ سے مکمل نہیں ہو سکا۔ ٹاس ہوئے بغیر چھ انسپکشن کے بعد میچ آفیشلز نے میچ ختم کرنے کا اعلان کیا۔
میچ ختم ہونے کے بعد کرکٹ شائقین نے بھارتی کرکٹ بورڈ سے اپنی رقم کی واپسی کا مطالبہ کیا۔ ایک شہری نے کہا کہ میں گندم کی تین بوریاں بیچ کر یہاں میچ دیکھنے آیا تھا، مجھے اپنی رقم واپس چاہیے۔ ایک اور شہری کا کہنا تھا کہ میچ دن میں کرایا جاتا تو زیادہ بہتر ہوتا، ہمیں میچ دیکھنا تھا، اب رقم کی واپسی بے معانی ہے۔
بھارتی میڈیا نے میچ ختم ہونے کی وجہ **اسموگ** قرار دی اور حکومت پر تنقید کی کہ ٹی ٹوئنٹی میچز کی شیڈولنگ درست نہیں، سرد موسم میں ان علاقوں میں میچز نہیں کرانے چاہیے تھے۔ رپورٹ کے مطابق گراؤنڈ میں کھلاڑی ماسک پہنے تھے اور ائیر کوالٹی انڈیکس 400 تک پہنچ گیا تھا۔
سوشل میڈیا صارفین نے بھی لکھنو کے وینیو اور اسموگ کے باعث بھارتی بورڈ کو شدید تنقید کا نشانہ بنایا اور شائقین کے تحفظات پر توجہ دینے کا مطالبہ کیا۔
