برطانوی جریدے فنانشل ٹائمز نے چیف آف ڈیفنس فورسز فیلڈ مارشل عاصم منیر کی متاثر کن شخصیت اور اسٹریٹجک بصیرت کا اعتراف کرتے ہوئے انہیں بدلتے عالمی نظام میں مؤثر رہنما قرار دیا ہے۔
فنانشل ٹائمز کے مطابق فیلڈ مارشل عاصم منیر کثیر الجہتی خارجہ پالیسی کے ماہر ہیں اور بدلتی عالمی سیاست نے درمیانی طاقتوں (middle powers) کے لیے نیا مگر پیچیدہ دور کھولا ہے، جس میں کامیابی کے لیے مؤثر حکمت عملی درکار ہے۔
رپورٹس کے مطابق فیلڈ مارشل عاصم منیر درمیانی طاقتوں کے سب سے کامیاب ملٹی الائنرز (multi-aligners) میں شامل ہیں اور ٹرمپ کے ساتھ بہترین ہم آہنگی رکھنے کا اعزاز بھی ان کے پاس ہے۔ جریدے نے انہیں مڈل پاورز کی سفارتکاری کی کامیاب مثال قرار دیا اور لکھا کہ پاکستان کی قیادت واشنگٹن، بیجنگ، ریاض اور تہران کے درمیان متحرک روابط میں رہی، اور فیلڈ مارشل عاصم منیر نے پاکستان کی سفارتکاری کو بدلتے عالمی ماحول میں مؤثر انداز میں آگے بڑھایا۔
جریدے نے مزید کہا کہ ٹرمپ کے ساتھ بروقت خوش گفتاری اور نرم سفارتی رویہ مؤثر ثابت ہوا، جس سے پاکستان کی سفارتی کامیابی حاصل ہوئی اور بھارت مایوسی کا شکار ہوا۔ بھارت کے لیے درمیانی طاقت کے کھیل میں بدلتے عالمی حالات اور ٹرمپ کے انداز کے ساتھ ہم آہنگی مشکل ثابت ہوئی، جس کے باعث بھارت کو مڈل پاور حکمت عملی میں مشکلات کا سامنا کرنا پڑا۔