لاہور: سابق پاکستانی فاسٹ بولر اور پاکستان کرکٹ بورڈ (پی سی بی) کے ڈائریکٹر ہائی پرفارمنس عاقب جاوید نے انکشاف کیا ہے کہ بھارت کی جانب سے فاسٹ بولرز کی رہنمائی کے لیے پاکستان سے رابطہ کیا گیا ہے۔
عاقب جاوید کے مطابق یہ رابطہ پی سی بی کے اوورسیز پلیئرز پروگرام کے ذریعے کیا گیا۔ انہوں نے بتایا کہ بھارت کی جانب سے درخواست کی گئی تھی کہ ان کے فاسٹ بولرز کو رہنمائی اور تکنیکی معاونت درکار ہے۔
عاقب جاوید، جو قومی سلیکشن کمیٹی کے رکن بھی ہیں، نے یہ بات پی سی بی کے آفیشل پوڈکاسٹ میں گفتگو کے دوران بتائی۔ اس دوران انہوں نے پاکستان کرکٹ کے موجودہ نظام، ہائی پرفارمنس اسٹرکچر اور طویل المدتی منصوبہ بندی پر تفصیل سے روشنی ڈالی۔
گفتگو کے دوران عاقب جاوید نے نیشنل ہائی پرفارمنس سینٹر کے کردار پر بھی بات کی اور اسے کھلاڑیوں کی ترقی کے لیے پی سی بی کا انجن روم قرار دیا۔ ان کا کہنا تھا کہ یہاں جدید سہولیات کے ذریعے کھلاڑیوں کی فزیکل، ٹیکنیکل اور ذہنی تربیت پر خصوصی توجہ دی جا رہی ہے۔
انہوں نے کہا کہ نیشنل کرکٹ اکیڈمی کے لیے بڑے منصوبے زیر غور ہیں، جن میں ایک مکمل فعال بایومیکینکس لیبارٹری کا قیام بھی شامل ہے، تاکہ فاسٹ بولرز اور دیگر کھلاڑیوں کی تکنیک کو سائنسی بنیادوں پر بہتر بنایا جا سکے۔
عاقب جاوید نے پی سی بی کے اوورسیز پاتھ وے پروگرام پر بھی روشنی ڈالی، جس کے تحت دنیا بھر کے کرکٹرز کو پاکستان میں کوچنگ اور تربیت کے مواقع فراہم کیے جا رہے ہیں۔ انہوں نے بتایا کہ غیر ملکی کھلاڑی اب پاکستان آ کر تربیت حاصل کر سکتے ہیں اور اب تک نیدرلینڈز اور انگلینڈ کے کھلاڑی اس پروگرام سے فائدہ اٹھا چکے ہیں۔
انہوں نے مزید کہا کہ یہ پروگرام مستقبل میں دنیا بھر تک پھیلایا جائے گا اور حالیہ دنوں میں بھارت سے بھی فون کالز موصول ہو رہی تھیں، جن میں ان کے فاسٹ بولرز کے لیے رہنمائی کی درخواست کی گئی۔
