ترکیہ میں ایک طیارہ اڑان بھرنے کے بعد گر کر تباہ ہو گیا، جس کے نتیجے میں لیبیا کے فوجی سربراہ سمیت 5 افراد جاں بحق ہو گئے۔
رپورٹس کے مطابق یہ طیارہ انقرہ کے ایسن بوغا ائیرپورٹ سے طرابلس، لیبیا کے لیے روانہ ہوا تھا۔ اڑان بھرنے کے تقریباً 30 منٹ بعد طیارے کا ائیر ٹریفک کنٹرولر سے رابطہ منقطع ہو گیا۔ طیارے نے دوبارہ انقرہ کی جانب رخ موڑنے کی کوشش کی، تاہم لینڈنگ سے قبل ہی یہ حادثے کا شکار ہو گیا۔
لیبیا کے وزیراعظم عبدالحمید الدبیبہ نے تصدیق کی کہ طیارے میں موجود آرمی چیف جاں بحق ہو گئے۔ رپورٹس کے مطابق جنرل محمد علی الحداد ترکیہ کے دورے پر تھے اور وہاں ترکیہ کے وزیردفاع سے ملاقات کے بعد واپسی کے دوران حادثے کا شکار ہوئے۔
ترکیہ نے واقعے کے بعد فضائی حدود عارضی طور پر بند کر دی ہیں اور سرچ اینڈ ریسکیو ٹیموں اور سکیورٹی اداروں کو ہائی الرٹ کر دیا گیا ہے۔ ترک وزیرداخلہ کے مطابق طیارہ شام 8 بجکر 10 منٹ پر روانہ ہوا جبکہ 8 بجکر 52 منٹ پر رابطہ منقطع ہو گیا۔ طیارے نے حیمانہ کے قریب ہنگامی لینڈنگ کی کوشش کی، تاہم رابطہ دوبارہ قائم نہ ہو سکا۔
