سعودی عرب: مسجد نبوی کے مؤذن شیخ فیصل نعمان، جنہوں نے 25 برس تک اذان دینے کا فریضہ انجام دیا، انتقال کر گئے۔
مسجد انتظامیہ کے مطابق شیخ فیصل نعمان کا انتقال 23 دسمبر کو ہوا اور نمازِ فجر کے بعد انہیں مدینہ منورہ کے تاریخی جنت البقیع قبرستان میں سپردِ خاک کیا گیا۔ شیخ فیصل نعمان کو سن 2001 میں مسجد نبوی کا مؤذن مقرر کیا گیا تھا اور ان کی آخری اذان کی ویڈیو بھی مسجد انتظامیہ نے جاری کی ہے۔
سعودی میڈیا کے مطابق اذان دینا شیخ فیصل نعمان کے خاندان کی روایت رہی ہے۔ ان کے والد اور دادا بھی مسجد نبوی میں مؤذن کے فرائض انجام دیتے رہے۔ ان کے والد کو محض 14 سال کی عمر میں مؤذن مقرر کیا گیا اور وہ 90 برس سے زائد عمر تک اس خدمت پر فائز رہے۔
شیخ فیصل نعمان اپنے والد کے انتقال کے بعد اس منصب پر فائز ہوئے اور دہائیوں تک اس مقدس فریضے کو سر انجام دیا۔
مسجد حرام اور مسجد نبوی کے مذہبی امور کے سربراہ شیخ ڈاکٹر عبدالرحمن السدیس نے مرحوم کے انتقال پر گہرے رنج و غم کا اظہار کیا اور اہل خانہ و لواحقین کے لیے تعزیت اور مرحوم کے درجات کی بلندی و مغفرت کی دعا کی۔
