امریکا کی شمال مشرقی ریاستیں شدید برفانی طوفان کی زد میں آ گئی ہیں، جس کے نتیجے میں سڑکوں پر کئی انچ برف جم گئی اور شہریوں کی نقل و حرکت متاثر ہو گئی۔
نیویارک سٹی کے سینٹرل پارک میں 4.3 انچ برف ریکارڈ کی گئی، جو جنوری 2022 کے بعد سب سے زیادہ ہے۔ برفباری کی وجہ سے حدِ نگاہ کم ہو گئی اور تقریباً 2100 سے زائد پروازیں منسوخ کر دی گئیں۔ نیوجرسی میں بھی ایمرجنسی نافذ کر دی گئی ہے۔
نیشنل ویدر سروس نے نیویارک اسٹیٹ اور کنیکٹی کٹ کے لیے برفانی طوفان اور موسم سرما کے شدید طوفان کی وارننگ جاری کی ہے۔ حکام نے شہریوں کو غیر ضروری سفر سے گریز کرنے کی ہدایت کی ہے۔
نیویارک کے گورنر نے ہنگامی حالت نافذ کرتے ہوئے شہریوں کو بلا ضرورت گھر سے نہ نکلنے کی ہدایت کی، جبکہ نیوجرسی اور کنیکٹی کٹ کے شہریوں کو بھی احتیاط برتنے کی ہدایت کی گئی ہے تاکہ جان و مال کا نقصان روکا جا سکے۔
