سندھ کے سینئر وزیر شرجیل انعام میمن اور وزیر بلدیات ناصر حسین شاہ نے کراچی میں ڈبل ڈیکر بس سروس کا افتتاح کر دیا۔
افتتاحی تقریب کے موقع پر حکام نے شرجیل انعام میمن کو ڈبل ڈیکر بسوں کی خصوصیات سے متعلق بریفنگ دی۔ اس موقع پر شرجیل میمن نے کہا کہ ہم نے عوام سے ڈبل ڈیکر بسیں چلانے کا وعدہ کیا تھا اور ایسے منصوبے لا رہے ہیں جن سے زیادہ سے زیادہ لوگوں کو فائدہ پہنچے۔
شرجیل میمن کے مطابق ڈبل ڈیکر بس کا روٹ 22 کلو میٹر پر مشتمل ہوگا اور اس کا کرایہ 80 سے 120 روپے کے درمیان رکھا گیا ہے۔ ابتدائی طور پر ڈبل ڈیکر بس سروس ملیر سے شارع فیصل تک چلائی جائے گی، جبکہ کوشش ہے کہ آنے والے وقت میں شہر کی تمام بڑی سڑکوں پر ڈبل ڈیکر بسیں نظر آئیں۔
انہوں نے مزید کہا کہ بس کرایوں میں سبسڈی دی جا رہی ہے اور روزانہ کی بنیاد پر عوام کے لیے سفری سہولیات میں اضافہ کیا جا رہا ہے۔ ان کا کہنا تھا کہ کوشش ہے نئے سال میں سندھ بھر میں ٹرانسپورٹ کی جدید سہولیات فراہم کی جائیں۔
شرجیل میمن نے بتایا کہ پیپلز بس سروس کے ذریعے روزانہ ایک لاکھ سے زائد افراد سفر کر رہے ہیں جبکہ گرین لائن بس سروس پر روزانہ 65 ہزار مسافر سفر کر رہے ہیں۔ انہوں نے کہا کہ ریڈ لائن بی آر ٹی منصوبے پر دوبارہ کام شروع ہو چکا ہے۔
صوبائی وزیر کا کہنا تھا کہ کراچی کی سڑکوں کی بہتری کے لیے تمام متعلقہ ادارے مل کر کام کر رہے ہیں۔ صنعتی علاقوں کے لیے 9 ارب روپے کا بجٹ مختص کیا گیا ہے جبکہ شاہراہ بھٹو کو اسٹیٹ آف دی آرٹ منصوبے کے طور پر عوام کے لیے مکمل کیا گیا ہے۔
