کراچی بڑی تباہی سے بچ گیا، سکیورٹی اداروں نے شہر میں دہشت گردی کا بڑا منصوبہ ناکام بنا دیا۔
سکیورٹی اداروں نے بروقت کارروائی کرتے ہوئے کراچی کو ایک بڑے سانحے سے بچا لیا۔ سکیورٹی حکام کے مطابق بلدیہ ٹاؤن کے علاقے رئیس گوٹھ میں خفیہ اطلاع کی بنیاد پر کارروائی کے دوران 4 ٹن سے زائد دھماکا خیز مواد برآمد کر لیا گیا، جو شہر میں بڑے پیمانے پر دہشت گردی کے لیے استعمال کیا جانا تھا۔
سکیورٹی حکام کا کہنا ہے کہ کارروائی کے دوران دھماکا خیز مواد سے بھرے ڈرمز کے علاوہ گیس سلینڈرز اور ایک منی ٹرک بھی تحویل میں لے لیا گیا ہے۔ برآمد ہونے والے مواد میں انتہائی خطرناک بارودی مواد شامل تھا، جسے شہر کے حساس علاقوں میں منتقل کرنے کی تیاری کی جا رہی تھی۔
حکام کے مطابق یہ کارروائی پہلے سے زیرِ حراست دہشت گردوں کی نشاندہی پر عمل میں لائی گئی۔ دورانِ تفتیش ملنے والی معلومات کی بنیاد پر سکیورٹی اداروں نے فوری کارروائی کرتے ہوئے دہشت گردوں کے مذموم عزائم کو خاک میں ملا دیا۔
سکیورٹی ذرائع نے بتایا کہ دہشت گردوں کا منصوبہ تھا کہ منی ٹرک میں دھماکا خیز مواد بھر کر کراچی کے مصروف ترین تجارتی علاقے آئی آئی چندریگر روڈ پر بڑا حملہ کیا جائے، جس سے جانی و مالی نقصان کے ساتھ ساتھ ملک کی معیشت کو بھی شدید نقصان پہنچایا جا سکتا تھا۔
سکیورٹی حکام کے مطابق برآمد شدہ بارودی مواد کو بم ڈسپوزل اسکوڈ نے موقع پر ہی ناکارہ بنا دیا۔ دھماکا خیز مواد 60 ڈرموں میں بھر کر شہر میں منتقل کیا گیا تھا، جبکہ 5 گیس سلینڈرز بھی قبضے میں لیے گئے ہیں، جنہیں ممکنہ طور پر دھماکوں کے لیے استعمال کیا جانا تھا۔
حکام کا کہنا ہے کہ علاقے کو مکمل طور پر کلیئر کر لیا گیا ہے اور مزید تحقیقات جاری ہیں تاکہ اس نیٹ ورک سے وابستہ دیگر عناصر کو بھی قانون کے کٹہرے میں لایا جا سکے۔ سکیورٹی اداروں نے شہریوں کو یقین دلایا ہے کہ شہر میں امن و امان برقرار رکھنے کے لیے ہر ممکن اقدامات کیے جا رہے ہیں۔
