لاہور:کیپٹن عصمد گلفام کو مکمل فوجی اعزاز کے ساتھ آبائی شہر لاہور میں سپردِ خاک کر دیا گیا۔
برزل ٹاپ پر ریسکیو آپریشن کے دوران جامِ شہادت نوش کرنے والے کیپٹن عصمد گلفام کی نمازِ جنازہ لاہور میں ادا کی گئی، جس میں جنرل آفیسر کمانڈنگ لاہور، آئی جی پنجاب پولیس، سینئر عسکری اور سول افسران کے علاوہ عوام کی بڑی تعداد نے شرکت کی۔ نماز جنازہ کے دوران شہید کی بہادری اور قربانی کو خراجِ عقیدت پیش کیا گیا۔
کیپٹن عصمد گلفام اُن افسران میں شامل تھے جو اپنی وردی کو صرف نوکری نہیں بلکہ امانت اور ذمہ داری سمجھتے تھے۔ ان کی شجاعت اور محنت کا مظاہرہ ریسکیو آپریشن کے دوران ہوا، جب 3 جنوری کی صبح دو بجے شدید سردی اور جان لیوا موسم میں کیپٹن عصمد گلفام اپنے ساتھیوں کے ہمراہ برف میں پھنسی سنو وہیکل کو بچانے کی کوشش کر رہے تھے۔ اچانک برفانی سلائیڈ کے باعث کیپٹن عصمد گلفام اور ان کے دو ساتھی شہید ہو گئے۔
شہید کی قربانی نے یہ واضح پیغام دیا کہ اس قوم کے محافظ ہر محاذ پر دفاعِ وطن کے لیے ہمہ وقت تیار ہیں اور اپنی جان کی پرواہ کیے بغیر عوام کی خدمت کرتے ہیں۔ کیپٹن عصمد گلفام کی بہادری اور قربانی کو فوجی حکام اور عوام نے یادگار قرار دیا اور اُن کے نام کو ہمیشہ زندہ رکھنے کا عزم ظاہر کیا۔
