بھارتی میڈیا نے دعویٰ کیا ہے کہ انٹرنیشنل کرکٹ کونسل (آئی سی سی) نے ٹی ٹوئنٹی ورلڈ کپ کے میچز بھارت سے منتقل کرنے کی بنگلا دیش کی درخواست مسترد کر دی ہے۔
رپورٹ کے مطابق بنگلا دیش کرکٹ بورڈ نے ٹی ٹوئنٹی ورلڈ کپ کے میچز بھارت کے بجائے کسی دوسرے ملک میں منتقل کرنے کی درخواست کی تھی، تاہم آئی سی سی نے یہ درخواست مسترد کرتے ہوئے بنگلا دیش کو میچز کے لیے بھارت جانے کی ہدایت کی ہے۔ رپورٹ میں یہ بھی دعویٰ کیا گیا ہے کہ اگر بنگلا دیش بھارت نہ گیا تو اسے میچز کے پوائنٹس سے محروم ہونا پڑ سکتا ہے۔
دوسری جانب بنگلا دیش کرکٹ کا مؤقف ہے کہ آئی سی سی کی جانب سے ایسا کوئی الٹی میٹم نہیں دیا گیا۔ بنگلا دیشی حکام کے مطابق گورننگ باڈی کے ساتھ بات چیت جاری ہے اور ابھی کوئی حتمی فیصلہ سامنے نہیں آیا۔
بنگلا دیش نے سکیورٹی خدشات کی بنیاد پر بھارت سے میچز منتقل کرنے کی درخواست کی تھی۔ ایک روز قبل بنگلا دیش کرکٹ بورڈ کے ڈائریکٹر آصف اکبر نے دو ٹوک الفاظ میں کہا تھا کہ بنگلا دیش کی ٹیم کسی بھی صورت ٹی ٹوئنٹی ورلڈ کپ کھیلنے بھارت نہیں جائے گی۔
یاد رہے کہ آئی پی ایل کی ٹیم کولکتہ نائٹ رائیڈرز نے بنگلا دیش کے فاسٹ بولر مستفیض الرحمان کو بھارتی ہندو انتہا پسندوں کی جانب سے ملنے والی دھمکیوں کے بعد لیگ سے باہر کر دیا تھا۔ اس واقعے کے بعد دونوں ممالک کے کرکٹ بورڈز کے درمیان تعلقات کشیدہ ہو گئے تھے، جس کے نتیجے میں بنگلا دیش کرکٹ بورڈ نے ہنگامی اجلاس بلا کر اپنی ٹیم کو بھارت نہ بھیجنے کا اعلان کیا تھا۔
