ملائیشیا اور انڈونیشیا نے بغیر اجازت خواتین اور بچوں کی غیر اخلاقی تصاویر بنانے کے معاملے پر ایلون مسک کے اے آئی پلیٹ فارم ’گروک‘ چیٹ بوٹ کو بلاک کر دیا ہے۔
دوسری جانب برطانیہ میں میڈیا واچ ڈاگ ادارے ’آف کام‘ نے بھی خواتین اور بچوں کی جنسی نوعیت کی تصاویر بنانے کے معاملے پر ’گروک‘ کے خلاف باضابطہ تحقیقات شروع کر دی ہیں۔
آف کام نے سوشل میڈیا پلیٹ فارم ایکس سے باقاعدہ طور پر وضاحت طلب کی ہے کہ برطانوی صارفین، بالخصوص خواتین اور بچوں کے تحفظ کے لیے کون سے اقدامات کیے گئے ہیں۔
برطانیہ کے متعدد وزرا اس بات کا عندیہ دے چکے ہیں کہ اگر آف کام نے ایکس پر پابندی کی سفارش کی تو وہ اس کی مکمل حمایت کریں گے۔
اس سے قبل برطانوی وزیرِاعظم کیئر اسٹارمر بھی Grok کے استعمال کو قابلِ نفرت اور شرمناک قرار دے چکے ہیں، جس کے بعد معاملے نے مزید سنگینی اختیار کر لی ہے۔
