پاکستان میں روس کے سفارتخانے نے روسی صدر ولادیمیر پیوٹن کی جانب سے پاک روس تعلقات پر کی گئی گفتگو جاری کر دی ہے۔ یہ بیان اس موقع پر سامنے آیا جب پاکستان کے سفیر فیصل نیاز ترمذی نے روسی صدر کو اپنی سفارتی اسناد پیش کیں۔
روسی سفارتخانے کے مطابق اس ملاقات کے دوران صدر ولادیمیر پیوٹن نے پاکستان کے ساتھ قریبی اور تعمیری تعاون کو سراہتے ہوئے کہا کہ روس پاکستان کے ساتھ مختلف شعبوں میں قریبی تعاون جاری رکھے ہوئے ہے۔ انہوں نے کہا کہ پاکستان شنگھائی تعاون تنظیم (ایس سی او) کا مکمل رکن ہے، جو خطے کی سب سے بڑی اور اہم علاقائی تنظیموں میں شمار ہوتی ہے۔
صدر پیوٹن کا کہنا تھا کہ روس اور پاکستان کے تعلقات حقیقی معنوں میں باہمی مفادات پر مبنی ہیں اور دونوں ممالک علاقائی استحکام، سلامتی اور اقتصادی تعاون کے فروغ کے لیے مشترکہ طور پر کام کر رہے ہیں۔
اس موقع پر سفیر پاکستان فیصل نیاز ترمذی نے کہا کہ پاکستان اور روس کے درمیان توانائی، تجارت، دفاع اور دیگر اہم شعبوں میں تعاون مسلسل فروغ پا رہا ہے۔ انہوں نے مزید کہا کہ روس میں مقیم پاکستانی برادری کے ساتھ روابط کو مزید مضبوط بنانے کو ترجیح دی جائے گی۔
خیال رہے کہ فیصل نیاز ترمذی نے اکتوبر 2025 میں روس میں پاکستان کے سفیر کی حیثیت سے اپنی سفارتی ذمہ داریاں سنبھالی تھیں، اور ان کی تقرری کو دونوں ممالک کے تعلقات میں نئی پیش رفت کے طور پر دیکھا جا رہا ہے۔
