کراچی: ایسوسی ایشن آف بلڈرز اینڈ ڈیولپرز (آباد) کے چیئرمین محمد حسن بخشی نے کہا ہے کہ تین دن کے اندر کراچی کی تمام عمارتوں میں فائر سیفٹی کے آلات نصب کرنا ممکن نہیں، کیونکہ اس وقت مارکیٹ میں مطلوبہ فائر سیفٹی آلات ہی دستیاب نہیں ہیں۔
فائر سیفٹی آڈٹ رپورٹ منگل کی شام جاری کی گئی، جس کی تفصیلات بھی سامنے آ گئی ہیں۔ رپورٹ میں شہر کی متعدد عمارتوں میں فائر سیفٹی کے ناقص انتظامات کی نشاندہی کی گئی ہے۔
چیئرمین آباد حسن بخشی نے پروگرام ’’آج شاہزیب خانزادہ کے ساتھ‘‘ میں گفتگو کرتے ہوئے کہا کہ رپورٹ میں جن عمارتوں کی نشاندہی کی گئی ہے، ان میں سے بہت سی عمارتیں 30 سے 35 سال پرانی ہیں، جن میں اس دور میں فائر سیفٹی کے جدید تقاضوں کو مدنظر نہیں رکھا گیا تھا۔
انہوں نے کہا کہ آباد کے اراکین نے گزشتہ 15 سے 20 سال کے دوران جو عمارتیں تعمیر کی ہیں، ان میں سے بیشتر میں فائر سیفٹی کے مناسب اقدامات موجود ہیں، تاہم اس سے پہلے تعمیر ہونے والی عمارتوں کے بلڈرز کو ہدایت دی گئی ہے کہ وہ فائر سیفٹی کے قوانین پر فوری طور پر عملدرآمد کریں۔
واضح رہے کہ سندھ بلڈنگ کنٹرول اتھارٹی (ایس بی سی اے) نے پورے کراچی میں تین دن کے اندر فائر سیفٹی سسٹمز نصب کرنے کا الٹی میٹم جاری کیا تھا۔ ایس بی سی اے کے مطابق ادارے نے اس حوالے سے چیئرمین آباد کو باقاعدہ خط لکھ کر آگاہ بھی کر دیا ہے۔
