کراچی کے گل پلازہ میں آگ لگنے کے واقعے سے متعلق نئی تفصیلات سامنے آئی ہیں، جس میں حکام نے سی سی ٹی وی فوٹیج کی مدد سے آگ کی مکمل ٹائم لائن تیار کر لی ہے۔
سی سی ٹی وی فوٹیج کے مطابق آگ پلازہ کی پچھلی جانب 10 بج کر 7 منٹ پر لگی، جبکہ 10 بج کر 12 منٹ پر ایمبولنسز جائے حادثہ پر پہنچنا شروع ہو گئیں۔ پلازہ کے ایم اے جناح روڈ والی سائیڈ پر آگ 10 بج کر 18 منٹ پر دیکھی گئی۔ آگ کو پلازہ کے پچھلے حصے سے اگلے حصے تک پہنچنے میں تقریباً 11 منٹ لگے، جس سے واضح ہوتا ہے کہ آگ نے انتہائی تیزی سے عمارت کے مختلف حصوں کو اپنی لپیٹ میں لیا۔
یاد رہے کہ گل پلازہ میں آگ لگنے کے بعد سرچ آپریشن بدستور جاری ہے۔ میزنائن فلور سے مزید 30 لاشیں برآمد ہوئی ہیں، جس کے بعد جاں بحق افراد کی مجموعی تعداد 61 ہو گئی ہے۔ ڈی آئی جی ساؤتھ اسد رضا کے مطابق دکانداروں نے میزنائن فلور پر لوگوں کی موجودگی کی نشاندہی کی تھی، اور تمام 30 لاشیں ایک ہی کراکری کی دکان سے نکالی گئی ہیں۔
حکام کے مطابق آگ لگنے کے بعد متعدد افراد نے اپنی جان بچانے کے لیے دکان کے اندر خود کو بند کر لیا تھا۔ متاثرہ افراد کی آخری موبائل لوکیشن بھی اسی جگہ کی ریکارڈ کی گئی، جو ریسکیو ٹیموں کے لیے رہنمائی کا باعث بنی اور تلاش میں مدد فراہم کی۔
